Partiya sədrləri iqtidar-müxalifət dialoqundan danışdılar

"Biz hələ də ciddi heç nə müzakirə etməmişik"

Dünən Azərbaycan hakimiyyətinin təmsilçiləri ilə siyasi partiyaların rəhbərləri arasında növbəti görüş keçirilib.

Görüşdə iştirak edən siyasi partiya rəhbərlərinin bir qismi sözügedən dialoq barədə Ölkə.az-a danışıblar.

İqbal Ağazadə (Ümid Partiyasının sədri): "Bu iqtidar müxalifət görüşlərində tematika hələ də müəyyən olunmayıb. Bu uzun illərdir Azərbaycan siyasi sahəsində olmayan bir şeylərin baş verməsidir. Biz hələ də ciddi heç nə müzakirə etməmişik. Hələ də bu danışıqları hansı istiqamətdə aparacağımızı müəyyən etməmişik. Hər bir halda masa arxasında əyləşməyin özü pozitivdir. Bunu davam etdirmək lazımdır. Sonrasına isə zaman-zaman baxacağıq".

Sərdar Cəlaloğlu (ADP sədri): "Onu deyim ki, iqtidar-müxalifət uzlaşmadıqca, Azərbaycan uçuruma gedə bilər. Bu həm siyasi, həm də iqtisadi böhrana səbəb olan amilərdir. O ölkədə ki, siyasi qüvvələr arasında əməkdaşlıq yoxdur orada heç bir siyasi inkişafdan söhbət gedə bilməz. Bu bir növ islahatlar tələb edir, bunun üçün bu islahatların ardıcıllığı və təhlükəsizliyi mütləqdir".

Mirmahmud Mirəlioğlu (KXCP sədri): Görüş bütün arzu və istəkləri reallaşdırmasa da, bizim vacib hesab etdiyimiz bütün məsələləri qaldırmışıq. Bu istiqamətdə fikir mübadiləsi aparmaq, bu günün tələblərinə uyğun olaraq razılaşmaq mümkündür".

Qeyd edək ki, bu tip görüşlərin hər iki aydan bir olacağını və konkret mövzularda müzakirələrin keçiriləcəyi nəzərdə tutulub.

Fatimə İbrahimova
Ölkə.az