Putin Əliyevlə görüşdü

Azərbaycan Prezidenti İlham Əliyevin və Rusiya Prezidenti Vladimir Putinin görüşü olub. Görüş avqustun 9-da Rusiyanın Soçi şəhərindəki “Boçarov Ruçey” iqamətgahında baş tutub.

V.Putin Rusiya ilə Azərbaycan arasında əlaqələrin yüksələn xətlə inkişaf etdiyini, ölkələr arasında etimadın gücləndiyini deyib.
Putin qeyd edib ki, müntəzəm olaraq prezidentlər, hökumət rəhbərləri səviyyəsində əlaqələr olur.

Rusiya prezidenti həmçinin Dağlıq Qarabağ münaqişəsi ilə bağlı uzun müddətdir həll olunmayan problemləri də müzakirə etməyi təklif edib.

Azərbaycanın dövlət başçısı isə qeyd edib ki, biz beynəlxalq arenada Rusiyaya əsas tərəfdaşlarımızdan biri kimi baxırıq. İ.Əliyev Dağlıq Qarabağ problemi ilə bağlı müzakirəsinə də toxunub. Onun sözlərinə görə, bu münaqişə uzun müddətdir davam edir və həllini tələb edir.

Qeyd edək ki, bu gün Putinin Ermənistan prezidenti Serj Sarkisyanla da görüşü planlaşdırılır.

Sabah isə Rusiya prezidentinin iştirakı ilə Azərbaycan və Ermənistan prezidentlərinin görüşü olacaq. ANS PRESS-in məlumatına görə, bunu Azərbaycan Prezident Administrasiyası rəhbərinin müavini, xarici əlaqələr şöbəsinin müdiri Novruz Məmmədov öz Twitter səhifəsində bildirib.

"Azərbaycan və Ermənistan prezidentləri arasında Ermənistan - Azərbaycan Dağlıq Qarabağ münaqişəsinin həlli istiqamətində danışıqlar gedəcək". (AzərTAc)

Ölkə.Az