Diasporla işləyən qurumlar Telman Cəfərovun qətlindən xəbərsizdirlər
Diasporadan xəbərsiz "diaspora ilə işləyən qurumlar"
Ukraynanın Luqansk vilayətinin Azərbaycanlılar Konqresinin sədr müavini Telman Sədi oğlu Cəfərov separatçılar tərəfindən güllələnərək öldürülüb.
Bu hadisəni araşdırmaq üçün DAK-ın sədri Sabir Rüsətəmxanlı, XİN-nin mətbuat xidmətinin rəhbəri Elman Abdullayev və Diasporla iş üzrə Dövlət Komitəsinin Analitik-informasiya şöbəsinin müdiri Elşad Miraləmlə əlaqə yaratdıq. Qeyd edək ki, bundan əvvəl Nazim İbrahimovun özü ilə əlaqə saxlamaq cəhdlərimiz isə boşa çıxdı. Diaspora ilə işlərin qurulması və onların fəaliyyətinin tənzimlənməsinə birbaşa cavabdeh olan bu dövlət komitəsinin işçiləri sanki zəngimizlə yuxudan oyanmışdılar. Komitənin daxilində isə müxbirimizə 5-6 nömrə verdilər ki, "bura zəng edin", "biz bilmirik bu biri nömrəyə zəng edin", "biz baxmırıq bu məsələyə"...
Xəbər səhər tezdən yayılsa da Ölkə.az-a açılama verən qurumların məsələdən xəbərsiz olduqları aydınlaşdı. Öldürülən həmyerlimizin Ukraynanın böyük şəhərlərindən birində diaspor təşkilatımızın sədr müavini olması Azərbaycan hakimiyyətinin diaspor siyasətinin yürüdülməsində aparıcı rolu oynamalı olan qurumların bu hadisədən xəbərsiz olmalarını həqiqətən utancverici bir hala çevirir. Bir anlığa təsəvvür edin ki, öldürülən şəxs erməni diasporunun rəhbərlərindən biridir. Əgər elə olsaydı, indi bütün erməni rəsmiləri, siyasətçiləri, deputatları, politoloqları səs-səsə verib dünyanı ayağa qaldırmışdılar. Bizdə isə... Xaricdə öz ölkəsini təmsil edən, onun siyasətini, xalqının mədəniyyətini təbliğ edən bir vətənpərvər azərbyacanlının faciəli ölümünün üstündən az qala yarım gün keçməsinə baxmayaraq heç bir rəsmi qurumun bu hadisədən xəbərin yoxdur.
Yalnız XİN-in mətbuat xidmətinin rəhbəri Elman Abdullayev məsələdən xəbərdar olduqlarını və Ukraynadakı səfirliyimizin xətti ilə hadisəni araşdırdıqlarını dedi.
Əlaqə saxladığımız qurumlardan müxbirimizə verilən cavabı diqqətinizə çatdırırıq:
Sabir Rüstəmxanlı: Ukraynada hər şəhərdə diaspora təşkilatlar var ancaq onların hamısı DAK-ın üzvü deyil. Mən şəxsən o adamı tanımıram. DAK olaraq bizim üçün fərqi yoxdur DAK-ın üzvüdür ya deyil. Hər hansısa bir azərbacanlı zərər çəkibsə, bu bizi təəssüfləndirir və biz onun haqlarını müdafiə etmək üçün səsimizi qaldırırıq. Ukraynada döyüş gedir. Ukrayna öz ərazi bütövlüyünü, suverenliyini qorumaq üçün müharibə şəraitindədir. Mən bilmirəm həmin adam dinc şəraitdə öldürülüb ya müharibə şəraitində öldürülüb. Orda olan azərbaycanlıların hamısı istərdi ki, Ukrayna ərazi bütövlüyünü və müstəqilliyini qorusun.
Elman Abdullayev: Məsələ ilə tanış olmuşuq. Ukraynadakı səfirliyimizə tapşırıq vermişik ki, hadisəni araşdırıb XİN-nə məlumat versinlər. Əraflı araşdırılandan sonra bu barədə mətbuata məlumat veriləcək.
Elşad Miraləm: Bu xəbəri dəqiqləşdirəcəyik. Bununla bağlı əlimizdə başqa bir məlumat yoxdur. Diasporla iş üzrə Dövlət Komitəsi və XİN Ukraynadakı vəziyyətə görə azərbaycanlılara müraciət edərək bildirilib ki, qaynar bölgələrdən kənar dursunlar.
Yəni cənab Miraləmin sözlərindən belə çıxır ki, "əcəb eləyib öldürüblər, axı biz demişdik, evinizdən bayıra çıxmayın"...
Səxavət Məmməd
Ölkə.az
