Oqtay Əsədov: “Beynəlxalq təşkilatlar qəbul etdikləri sənədləri həyata keçirməlidir”
“Ölkə.Az” xəbər verir ki, bunu Milli Məclisin sədri Oqtay Əsədov bu gün Nur-Sultan şəhərində öz işinə başlayan Avrasiya ölkələri parlament sədrlərinin IV konfransı çərçivəsində “Böyük Avrasiya: Dialoq. Etimad. Tərəfdaşlıq” mövzusunda keçirilən konfransında çıxşı zamanı deyib.
O.Əsədov bidlirib ki, uzun illərdən bəri Azərbaycan beynəlxalq birliyə çağırışlar edərək ədalətin bərpa olunmasını, beynəlxalq təşkilatların qəbul etdikləri sənədlərin həyata keçirilməsini tələb edir. Milli Məclis sədri bu münaqişənin, eləcə də digər oxşar münaqişə və problemlərin dövlətlərin sərhədlərinin toxunulmazlığı və ərazi bütövlüyü prinsipi əsasında nizama salınmasının Avrasiya qitəsində və bütün dünyada sülhün, sabitliyin, ədalətin və təhlükəsizliyin təmin edilməsi işinə xidmət edəcəyinə əminliyini bildirib.
O. Əsədov çıxışında onu da bildirib ki, bu konfrans Avrasiyanın bu günü və gələcəyi ilə bağlı olan mühüm məsələlərin böyük bir kompleksini müzakirə etməyə imkan yaradır: “Burada aparılan fikir mübadiləsi qitəmiz üçün daha yaxşı gələcək qurulması yolları ilə bağlı parlamentimizin ortaq mövqeyinin müəyyən olunmasına kömək edəcək”.
Böyük sivilizasiyaların və mədəniyyətlərin beşiyi olan Avrasiyanın Avropa və Asiya ərazilərinin mexaniki birləşməsi deyil, spesifik xarakteristikalara malik vahid məkan olduğunu vurğulayan O. Əsədov parlamentlərarası əməkdaşlığın və onun keyfiyyətcə yeni mərhələsi olan parlament diplomatiyasının əhəmiyyətini qeyd edib.
O, hökumətlərin xarici siyasət qərarlarına təsir göstərmək üçün spesifik siyasi mexanizm və alətlərə malik olan parlament diplomatiyasının dövlətlər arasında işbirliyinin inkişafında mühüm rol oynadığını deyib.
O. Əsədov Milli Məclisin Avrasiya məkanında yerləşən dövlətlərin parlamentləri ilə qarşılıqlı etimada əsaslanan dialoq və tərəfdaşlıq münasibətlərinin qurulması üçün çalışdığını qeyd edib. O bildirib ki, Milli Məclis Avrasiya məkanında təşəkkül tapmış ikitərəfli və çoxtərəfli əməkdaşlıq formatlarının, iqtisadi inteqrasiyanın güclənməsinə, dayanıqlı inkişaf məqsədlərinin əldə edilməsinə töhfə verir.
Azərbaycanın fəal iştirakı ilə həyata keçirilən transmilli layihələrin Avrasiya qitəsinin çox geniş bir bölgəsində inkişafın, sülhün, sabitliyin, təhlükəsizliyin, dialoqun və qarşılıqlı anlaşmanın təmin edilməsinə yönəldiyini vurğulayan O.Əsədov BTC neft, Bakı-Tbilisi-Ərzurum, TAP və TANAP qaz kəmərlərinin, digər enerji-nəqliyyat layihələrinin Avrasiya qitəsinin firavan gələcəyində mühüm rol oynadığını qeyd edib.
Konfransa Avropa və Asiyanın 60-dan çox ölkəsindən parlament rəhbərləri və nümayəndə heyətləri, 10-dan çox beynəlxalq parlament təşkilatının təmsilçiləri qatılıblar.
Qazaxıstan Respublikasının birinci Prezidenti-Elbası Nursultan Nazarbayev konfransda çıxış edərək Avrasiya ölkələrinin parlamentlərini qanunvericilik sahəsində əməkdaşlığın səmərəliliyini artırmağa çağırıb. O, həmçinin dünya dövlətlərinin nüvə silahının yayılmasına qarşı prosesə qoşulmasının önəmini vurğulayıb.
Konfrans Qazaxıstanın birinci Prezidenti Nursultan Nazarbayevin Avrasiya inteqrasiyası ideyasının 25 illiyinə həsr edilib.
Mürtəza
Ölkə.Az
