Fazil Mustafa: "Mitinqlərin siyasi proseslərə təsir imkanları məhduddur"

"Bunu cəmiyyət həyatına təsir edən, hər hansısa bir dəyişiklik gətirən hadisə hesab etmirəm"

"Dünənki mitinq adi mitinqlərdən biri idi. Hesab edirəm ki, istənilən demokratik ölkələrdə insanlara bu imkanlar tanınmalıdır. Mitinqlərin təsir imkanları məhdud olduğundan bunu cəmiyyət həyatına təsir edən, hər hansısa bir dəyişiklik gətirən hadisə hesab etmirəm".

Bu sözləri Ölkə.az-a millət vəkili Fazil Mustafa dünən Milli Şuranın keçirdiyi mitinqi şərh edərkən deyib.

Millət vəkili mitinqdə iştirak edən insanların sayının əhəmiyyətli olmadığını, söhbətin saydan deyil, orada səslənən fikirləri dinləməkdən ibarət olduğunu bildirdi.

"O ki, qaldı mitinqdə iştirak edənlərin sayına, bu önəmli deyil. Çünki orada 100 nəfər də olsa, 5 nəfər də olsa, hər kəsin fikir bildirmə haqqı var. Və məsələnin əsas mahiyyəti də elə budur. Söhbət saydan getmir, söhbət orada səslənən fikirləri dinləməkdən gedir. Ən əsas məsələ hüququn gerçəkləşməsidir".

Qeyd edək ki, növbəti aksiya aprelin 5-nə təyin edilib.

Fatimə İbrahimova
Ölkə.az