ABŞ universitetlərində Azərbaycana həsr edilmiş tədbirlər keçirilib

ABŞ-ın aparıcı Harvad (Massaçusets) və Braun (Rod Aylənd) universitetlərində təhsil alan azərbaycanlı tələbələrin təşkilatçılığı və Amerika-Azərbaycan Alyansının dəstəyi ilə Azərbaycanın tarixi və mədəniyyətinə həsr edilmiş tədbirlər keçirilmişdir.

Massaçusets və Rod Aylənd ştatlarının müxtəlif ali təhsil müəssiəsələrində təhsil alan xarici tələbələrin iştirakı ilə Harvard və Braun universitetlərində keçirilmiş tədbirlərdə Azərbaycanın tarixi, mədəniyyəti və müasir uğurlarını əks elətdirən video və foto materillar, eləcə də milli mətbəx nümunələri sərgilənmişdir. ABŞ-da təhsil alan azərbaycanlı tələbələrin ifasında müxtəlif musiqi və rəqs nümunələri göstərilmişdir.

Harvard Universitetində azərbaycanlı və türk tələbə cəmiyyətlərinin təşkilatçılığı ilə "Qədim bağlar, gələcəyin torpağı" adlı tədbirdə amerikalı tələbələrlə yanaşı, Türkiyə, Çin, İndoneziya, İsrail, Qazaxstan və s. ölkələrdən olan tələbələr də iştirak etmişlər. Tədbirdə eləcə də Türkiyə Respublikasının Bostondakı Baş Konsulu Ömür Budak da əsas qonaq qismində qatılmışdır.

Çıxış etmiş türk diplomat diplomatik fəaliyyətinin bir neçə ilini Azərbaycanda keçiridiyini xüsusilə vurğulayaraq, bu səbəbdən Azərbaycana həsr edilmiş tədbirlərdə iştirakı özünə borc bildiyini söyləmişdir. Ömür Budak Azərbaycanın regional əhəmiyyətindən danışmış, Türkiyə-Azərbaycan münasibətlərinin mənəvi bağlar üzərində qurulduğunu bildirmişdir.

Braun Universitetində keçirilmiş mədəniyyət tədbirində universitetin müxlətif ölkələrdən olan tələbələri iştirak etmiş və öz mədəniyyətlərini əks elətdirən rəqs nümunələri nümayiş etdirmişlər. Azərbaycanlı tələbələr bu il ilk dəfə olaraq bu çoxmillətli tədbirə qatılmış və "Azərbaycan-Dünya mədəniyyət gecəsi" başlığı altında Azərbaycan mədəniyyətini tanıtmışlar. Tədbirdə Azərbaycana dəstək üçün Rod Aylənd ştatının senatoru Leonidas Raptakis də universitetin xüsusi qonağı qismində iştirak etmişdir.

Azərbaycanlı tələbələrin təşkilatçılığı ilə keçirilmiş hər iki tədbirdə Azərbaycanın ABŞ-dakı Səfirliyinin əməkdaşları da iştirak etmişdir. Səfirlik nümayəndəsi Natiq Baxışov çıxış edərək, ABŞ-Azərbaycan münasibətləri, eləcə də Azərbaycanın aparıcı rolu ilə həyata keçirlən regional layihələr barədə məlumat vermişdir. Çıxışlar zamanı eləcə də bu tədbirlərin Azərbaycanda Amerika günlərinin keçirildiyi bir vaxtda təşkil edildiyi vurğulanmışdır./Trend/