XİN-dən ABŞ Dövlət Departamentinin bəyanatına reaksiya

Xarici İşlər Nazirliyinin mətbuat xidməti ABŞ Dövlət Departamentinin Azərbaycanda əfv sərəncamının imzalanması ilə bağlı verdiyi son bəyanata münasibət bildirib.

Ölkə.Az xəbər verir ki, mətbuat katibi Hikmət Hacıyev bildirib ki, Azərbaycanda qanunun aliliyi təmin olunub və davamlı demokratik inkişaf yolunda ardıcıl addımlar atılır:

"Azərbaycan beynəlxalq təşkilatlar çərçivəsində üzərinə götürdüyü öhdəliklərinə sadiqdir və əməli fəaliyyəti ilə bunu nümayiş etdirir. Bütün bu tədbirlər ilk növbədə Azərbaycan hökumətinin fəaliyyətinin əsasını təşkil edən Azərbaycan vətəndaşlarının mənafeyi naminə edilir. Heç kim siyasi baxışlarına görə təqib edilmir.

Azərbaycana çağırış edən Dövlət Departamentinin Azərbaycanın işğal olunmuş ərazilərindən öz qoşunlarını çıxarmaq üçün ATƏT üzrə öhdəliklərini və BMT Təhlükəsizlik Şurasının qətnamələrinin tələblərini yerinə yetirmək üçün Ermənistana israrlı çağırış etməsi və azərbaycanlı qaçqın və məcburi köçkünlərin pozulmuş hüquqlarının bərpa edilməsi məsələsini qaldırması daha təqdirəlayiq olardı".

Ölkə.Az