Azərbaycanlı millət vəkilləri Ukraynaya dəvət olundular

"Görüşdə ölkələrimiz arasında olan dostluq və qardaşlıq əlaqələrindən geniş bəhs edilib"

"Dünən Milli Məclisdə Azərbaycan-Ukrayna parlamentlərarası əlaqələr üzrə işçi qrupunun üzvləri olaraq, ölkəmizdə səfərdə olan Ukrayna Ali Radasının nümayəndə heyəti ilə çox səmimi və səmərəli görüşümüz oldu. Görüşdə ölkələrimiz arasında olan dostluq və qardaşlıq əlaqələrindən geniş bəhs edilərək, qarşılıqlı maraq doğuran məsələlər ətrafında səmərəli fikir mübadiləsi aparıldı".

Bu sözləri Ölkə.Az-a danışan Millət Vəkili İqbal Məmmədov deyib.

"Eyni zamanda, Parlamentlərarası əlaqələrin möhkəmləndirilməsi üçün qarşılıqlı səfərlərin vacibliyi qeyd edildi və Ukrayna-Azərbaycan parlamentlərarası əlaqələr üzrə işçi qrupunun rəhbəri, Ali Radada Pyotr Poroşenko Blokunun deputatı Roman Nəsirov tərəfindən Ukraynaya dəvət edildik.

Xatırladaq ki, dünən Milli Məclisdə ölkəmizin Qara Dəniz İqtisadi Əməkdaşlıq Təşkilatının (QDİƏT) Parlament Assambleyasındakı nümayəndə heyətinin Ukrayna Ali Radasının Azərbaycanla parlamentlərarası əlaqələr üzrə işçi qrupunun üzvləri ilə görüşü keçirilmişdir.

Görüşdə QDİƏT Parlament Məclisində nümayəndə heyətimizin üzvü, deputat Musa Quliyev ölkələrimiz və xalqlarımız arasında hər zaman möhkəm dostluq əlaqələrinin olduğunu qeyd etmişdi.

Ölkə.az