Nəqliyyat Nazirliyində Türkiyə nümayəndə heyəti ilə görüş keçirildi

Nazirlik məlumat yaydı.

Aprelin 15-16-da Nəqliyyat Nazirliyində Türkiyə Respublikası İqtisadiyyat Nazirliyinin İdarə rəisi Uğur Öztürkün rəhbərlik etdiyi nümayəndə heyəti ilə görüş keçirilib.

Bu barədə Ölkə.Az-a Nəqliyyat Nazirliyindən məlumat verilib.

Görüş zamanı nəqliyyat nazirinin müavini Arif Əsgərov nəqliyyat-yol kompleksində görülən işlər barədə məlumat verib, eləcə də Türkiyə və Azərbaycan arasında nəqliyyat sahəsində əməkdaşlıq imkanları və regionda nəqliyyat əlaqələrimizin inkişafı üçün perspektiv layihələr barədə danışıb.

“Görüşdə tərəflər Gürcüstan və Azərbaycandan keçməklə Türkiyədən Mərkəzi Asiyaya avtomobil yükdaşımalarının artırılması ilə bağlı müzakirələr aparıb. Müzakirələrdə gömrük və sərhəd-keçid prosedurları, liman xidmətləri və dəniz daşımaları ilə bağlı məsələlər, o cümlədən Yeni Bakı Beynəlxalq Dəniz Ticarət Limanından istifadə, Türkiyəyə məxsus yük avtomobillərini bərələrlə daha böyük həcmdə daşıma imkanları, rüsum və tariflər və bu daşımaların asanlaşdırılması ilə bağlı digər məsələlər ətrafında qarşılıqlı fikir mübadiləsi aparılıb” - deyə, nazirliyin məlumatında deyilir.

Səfər çərçivəsində liman və dəniz daşımaları sahəsində müvafiq infrastruktur obyektləri ilə tanışlıq, eləcə də Bakı Beynəlxalq Ticarət Limanı və Ələt qəsəbəsindəki Yeni Beynəlxalq Dəniz Ticarət Limanı kompleksinə səfərlər təşkil edilib.

Qeyd edək ki, görüşdə müvafiq dövlət qurumlarının nümayəndələri də iştirak edib.

Ölkə.Az