Tural Abbaslı: "Partiyanı kimlərinsə öhdəsinə buraxıb harasa getmək fikrimiz yoxdur"
Vurğun Əyyubun Müsavat partiyasından çıxardılmasından sonra, Müsavat Partiyası Mərkəzi Nəzarət-Təftiş Komissiyasının (MNTK) sabiq sədri İbrahim İbrahimli də partiyadan istefa verib.
Müsavat partiyası daxilində baş verənlərlə bağlı partiyanın məclis üzvü Tural Abbaslı Ölkə.az-ın suallarını cavablandırıb.
- Öncə Müsavat partiyasından söz sahibləri olan Vurğun Əyyub, sonra isə İbrahim İbrahimli getdi. Mümkünsə bunu şərh edərdiniz...
- Vurğun Əyyubu rəhbərliyin siyasi qərarı ilə Müsavat partiyasının Binəqədi özəyində xaric ediblər. Məndə olan məlumata görə, özəkdə keçirilən iclas düzgün keçirilməyib. Özəyin legitim olub-olmaması müzakirə mövzusudur. Vurğun Əyyubun və digər müsavatçıların partiyadan uzaqlaşmasının əsas səbəbi indiki rəhbərliyin dözümsüzlüyüdür. Məhz Arif Hacılının əks fikrə dözümsüzlüyüdür, opponetlərindən qurtlumaq arzusudur.
Təəssüf ki, Müsavat partiyası daxilində hökm sürən demokratik ənənələrə böyük zərbələr vurldu. Bu zərbələr Müsavat partiyasının adı ilə bağlanır, tarix qarşısında məsluliyyət yaradır. Düşünülmədən bu günkü korporativ maraqlara uyğun qərarlar verilib, addımlar atılır.
Hansısa ziyalı Vurğun Əyyuba olan münasibəti görəndə avtomatik o hərəkəti özünə qarşı edilmiş kimi görür və gələcəkdə bununla üzləşməmək üçün özü istefa verir və yaxud partiyadakı fəaliyyətini minumuma endirir. Bu da ümumilikdə partiyaya və Azərbaycan müxalifətinə ziyandır.
Necə ola bilər ki, eyni insanlar İsa Qəmbərin başqanlıq dövründə eyni təşkilatda, eyni qərargahda fəaliyyət göstərə bilirdilər, amma indi bunu edə bilmirlər? Bunun səbəbi var, o da indiki rəhbərlikdir.
Acınacaqlısı da odur ki, rəhbərlik bu cür halların varlığını inkar edir. Vurğun Əyyubun çıxarılmasını guya partiyaya gəlməməklə, fəaliyyət göstəməməklə və üzvlük haqqı ödəməməklə bağlayırlar. Bəsit arqumentlərlə partiya gözdən salınır. Bu partiyanın sıravi üzvləri arasında da qarşıdurma yaradır. Arif Hacılı bu baş verənlərə görə konkret addımlar atmasa, Müsavat partiyası zəifləyə-zəifləyə gedəcək. Sonun nə olacağını isə adam düşünmək belə istəmir...
- Siz özünüzə qarşı da belə bir təhlükə görürsüz?
- Mənə qarşı hələki rəsmi şəkildə iradlar bildirilməyib. Ancaq "gözü çıxmış qardaşdan" görmək olur nə olacağını. Mən də Arif Hacılının partiyadaxili siyasətini dəstəkləmirəm. Onun atdığı addımların partiyaya xeyir verdiyini düşünmürəm. Mən və ətrafım da rəhbərliyə opponent olan kəsimə aidik. Müsavat partiyasını Azərbaycanda bərpa edənlərdən, Müsavat partiyasının bərpa təşkilat komitəsinin üzvü olmuş bir insanı özəkdə 4 nəfərin iştirakı ilə partiyadan çıxardıblar. Bu hadisə bizi də düşündürür. Biz müsavatçıyıq, partiyamızdan kimlərəsə görə imtina etmərik. Partiyanı kimlərinsə öhdəsinə buraxıb harasa getmək fikrimiz yoxdur.
- Ola bilər ki, Qubad İbadoğlunun yaratdığı ADR hərəkatına qoşulasınız?
- Yox. Nə Qubad İbadoğlunun, nə də digər siyasi şəxslərin yaratdığı təşkilatda, nə də hazırda fəaliyyət göstərən başqa bir partiyada təmsil olunmayacam. Əgər harasa qoşulmaq lazım gələrsə yeni gənclərlə, yeni simalarla özümüz nə isə edərik. Ancaq hələki belə bir fikrimiz yoxdur.
- Əgər sizi partiyadan xaric etsələr yeni hərəkat və yaxud partiya yaradarsınız?
- Hələ mənim çıxarılmamı müzakirə etmirlər. Sentyabr ayında siyasi fəaliyyətimin 15 ili tamam olur, bu illəri hansısa siyas intriqalara qurban vermərəm...
Səxavət Məmməd
Ölkə.az
