Oscar statues
Mətn ölçüsü:
  • 100%

\"Gətirək lap Azərbaycan vətəndaşlığı da verək, qoy işləsinlər\"

“Bu gün Ələt azad ticarət zonası haqqında qanunu müzakirə edirik və təbii ki, bəyənirəm və səs verəcəyəm. Bizim xeyli iş adamımız, xeyli xarici sahibkar gözünü bura dikib. Amma işlərin sürəti ürəkaçan deyil. Biz bu zonanı istifadəyə verəndə, gözümüzü açıb görəcəyik ki, qonşu ölkələr bazarı tutub. Əlsində, artıq bazar tutulub desək yanılmarıq. Həm dost Türkmənistan, İran və Qazaxıstanda artıq dəniz terminalları tikilib və ya sonuncu mərhələsindədir. Azad ticarət zonalarının yaradılması yüz minlərlə iş yeri, istehsal, yüzlərlə xarici şirkətin ölkəyə gəlməsi və milyardlarla vəsait yatırması deməkdir”.  

"Ölkə.Az" xəbər verir ki, bunu parlamentin bugünkü plenar iclasında Milli Cəbhə Partiyasının sədri, deputat Razi Nurullayev deyib. Deputat qeyd edib ki, Azad ticarət zonaları haqqında ayrıca qanun qəbul etməliyik və azad iqtisadi zonalar da bunun əsasında işləməlidir:

“Neçə illərdi Ələt azad ticarət zonasını işə sala bilməmiş və qanunvericiliyi də dünya standartları səviyyəsində qəbul edə bilməmişik. Yadımdadır ki, 90-cı illərin ortalarında BMT-nin regional əlaqələndiricisi var idi, adını unutmuşam, azad ticarət zonasının yaradılması üçün ölkəmizdə qapı qalmadı döydü, amma bu işə start verilmədi. Mən onun səylərini və çabalarını xatırlayıram, ürək ağrısı ilə şikayətlərini də dinləmişdim. Deyirdi ki, əgər indi qəbul etsəniz, 15-20 ilə Azərbaycan Dubaya çatar. Qəbul etməsəniz neft pulları sel kimi gəlsə də, arzu etdiyiniz inkişafa nail ola bilməyəcəksiniz. Açıq deyirdi ki, korrupsioner məmurlar buna imkan vermir. Hər kəs soruşur ki, mənə nə xeyri olacaq, maksimum bu gün və sabah. Doğurdan da həmin zaman xeyli vəzifəli şəxs ölkəni talayırdı, dağıdırdı və ancaq özü üçün çalışırdı. Bu özü üçün çalışmaq, dağıtmaq və bütün reformist fikirləri boğan məmur kütləsi ölkəmizi gətirib çıxarıb 2021-ci ilə, amma hələ də bizim qanunumuz yoxdur”.  

Razi Nurullayev bildirib ki, baş qarışdı dövlət əmlakını qəpik-quruşa özəlləşdirib xaricə daşımağa:

“Baş qarışdı bütün torpaqları özəlləşdirməyə və almağa. İndi ölkə boyu bir qarış torpaq tapılmır ki, dövlət obyektləri tikilsin. Bu qədər torpaq həvəskarı olanlar və hər qarışın üzərinə qanad sərib "mənimdir" deyən xeyli adamlar necə imkan verdi ki, 20% torpağımız 30 il düşmən tapdağı altında qaldı, onu başa düşmürəm. Şükür ki, cənab Prezidentin düzgün zaman seçməsi, qətiyyəti, ordumuzun əsgər və zabitlərinin rəşadəti ilə o torpaqları azad etdik.
Dünyada mövcud olan azad iqtisadi zona tipindən ölkəmizdə cəmi biri işləkdir. Bu da sənaye zona və məhəllələridir. Qalanları Azad ticarət zonaları, Xüsusi gömrük zonaları, Xüsusi ticarət-sənaye zonaları, Texniki-iqtisadi inkişaf zonaları, Yeni və yüksək texnologiyanın inkişafı zonaları, Açıq rayonlar və Offşor zonaları isə ya yoxdur, ya da ərazi ayrılıb, hasarlanıb, qalıb günəşin altında. Bu məsələləri həll etmək üçün xarici mütəxəssislərə ehtiyac var. Gətirək onlardan 200-300 nəfər, lap Azərbaycan vətəndaşlığı da verək, qoy işləsinlər. Elə özümüz özümüzü aldatmaqla məşğuluq. Hər kəs də deyir, hər şeyi bilirəm, sonunda sıfır nəticə. Allah Azərbaycanı qorusun!”

Mürtəza
Ölkə.Az