"Məhəmməd Əmin Rəsulzadə belə bu dəqiqə sağ olub partiya rəhbərliyni tənqid etsə idi, onu da qovardılar"

Bir zamanlar mitinqlər, aksiyalar, müxtəlif siyasi layihələri ilə gündəmdə olan Müsavat partiyası hal-hazırda aşınmaq üzrədir. Bu müxalifət partiyası son zamanlar ancaq qovulmalar və gurultulu istefalarla gündəmdədir.

Neçə-neçə tanınmış şəxs partiya sıralarından ya istefa verir, ya da yeni seçilmiş rəhbərlik tərəfindən partiyadan qovulur. Müsavat partiyasında baş verənlərlə bağlı Ölkə.az-ın suallarını Başqanlığa sabiq namizəd Tural Abbaslı cavablandırıb.

- Müsavat partiyası son günlər qovulmalar, istefalarla gündəmdədir. Bunun əsl səbəbi nədir?

- Bu dəqiqə Müsavat partiyasında baş verənlər döyüş öncəsi öz ordusunun generallarını və döyşəkən əsgərlərini edam etdirən qərargahın əmrlərinə bənzəyir. Necə ki, Stalin 1-ci dünya müharibəsindən qalmış təcrübəli generalları güllələtdirmişdi və sonradan bunun acı nəticələrini bütün ölkə yaşadı. Eləcə də Müsavat partiyasında bu proseslər gedir. Müsavat partiyası bərpa ediləndən bu yana partiyanın simaları olmuş şəxslərin qovulması çox ağrıverici bir haldır. Son istefa verən Nizaməddin bəydir. Müsavat partiyasının Nizami rayon təşkilatını yaradıb. Nizami rayon təşkilatı Müsavatın ən güclü rayon təşkilatlarından biri olub. 2003-cü ildə Nizami rayon təşkilatı tək başına mitinq keçirəcək səviyyədə idi. Rövşən Dəmirli dünən partiyanın Divanından çıxarıldı. Rövşən Dəmirli Suraxanı kimi böyük bir rayonda böyük nüfuza malik olan bir şəxs idi. 2000-ci ildə mən partiyaya üzv olanda bu adlar partiyada idi. Bu gün hansısa intriqalara görə, hansısa maraqlara görə, belə adlar partiyadan uzaqlaşdırıldı. Əli Qasmbəyli Qarabağ qazisidir. Onu da partiyadan uzaqlaşdırdılar. Belə fədakar, döyüşkən insanları partiyadan qovaraq güclü partiya kimi siyasi səhnədə qalmaq olmaz. Uzaqbaşı balaca qrupun rəhbəri olmaq olar. Bunu Arif Hacılının komandasındakı idarəçilik təcrübəsi az olan adamlar bilməyə bilər, ancaq Arif Hacılı bunu gözəl bilir. Yaxın günlərdə rayon təşkilatları buraxıldı. Nizamnamə ilə də bu addımın atılması düzgün deyildi. Suraxanı rayon təşkilatında konfransa hazırlıq komitəsi yaradılıbsa, onu niyə buraxıb təzəsini yaradırsan, həm də özünə sərf edən adamlarla? Rayon təşkilatlarından kimlərisə çıxarmaq olar, amma bu əsas vermir ki, rayon təşkilatını buraxsınlar. Bu olanlar bir daha göstərir ki, burda verənlər qrup maraqlarıdır. İndiki rəhbərlik Müsavatı Azərbaycanda hakimiyyətə gəlmək uğrunda mübarizə aparan bir partiya deyil, daxildən rahat idarə oluna biləcək qurum halına gətirir.

- İsa Qəmbər başqan deyil, məclis üzvüdür. Ancaq illər uzunu Müsavat başqanı olub, hər halda partiya daxilində çəkisi var. Bəs o, niyə müdaxilə etmir bu baş verənlərə? Yoxsa o da qorxur ki, etiraz etsə, onu da qovacaqlar?

- İsa Qəmbərdən açığı heç nə gözləmirəm. Baş verən proseslərə müdaxilə etmək istəsə, indiyə qədər edərdi, ancaq etmədi. Onun belə bir öhdəliyi də yoxdur. İsa Qəmbər partiyanın adi məclis üzvüdür. 140 məclis üzvündən biridir. O, başqan olduğu dönəmdə partiyada baş verənlərin mənfisinə-müsbətinə cavabdeh idi və cavabını da verirdi. İndiki halda bu məsələlərin İsa Qəmbərin və digərlərinin üstünə atılmasının tərəfdarı deyiləm. Çünki, Arif Hacılı başqandır, ona görə də məsuliyyət onun boynundadır. Bütün proseslərin cavabdehi Arif Hacılıdır, çünki pariyanın rəhbəri odur. Könül istəyər ki, İsa Qəmbər ağsaqqal kimi narazılarla Arif Hacılının komandasını bir yerə yığsın və lazımsız qarşıdurmanın qarşısın alsın. Bu dəqiqə Müsavat pariyası hakimiyyətə alternativ fikirlərlə deyil, daxili qarşıdurmalarla tanınır.

- Rəhbərlik bu qədər problemləri görmür, yoxsa bunları problem hesab etmir?

- Ən dəhşətlisi də odur ki, bu günə qədər Müsavat partiyası rəhbərliyi partiya daxilində problemin olduğunu qəbul etmir, etmək də istəmir. Müalicədə belə bir tendensiya var: əgər sağalmaq istəyirsənsə xəstə olduğunu qəbul etməlisən. Bu gün Arif Hacılı və komandası Müsavat partiyasının hansı problemlərin ağuşunda olduğunu hələ də qəbul edə bilmirlər. "Böyük dayaq" filmində deyilən kimi, "O sözləri deyənlər mənim düşmənlərimdir". Bu dəqiqə Müsavata qarşı obyektiv belə tənqid səsləndirsə o dəqiqə o xəyantkar, satqın olur. Məhəmməd Əmin Rəsulzadə belə bu dəqiqə sağ olub, indiki rəhbərliyi tənqid etsə onu da qovardılar.

Səxavət Məmməd
Ölkə.Az