\"Azərbaycan xalqı qürurludur, bir daha bu ədalət pozulmayacaq\"
“Ulu öndər Heydər Əliyev hələ zamanında deyirdi ki, tarix hər şeyi öz yerinə qoyur və ədaləti bərpa edir. Belə də oldu. Allahın yardımı, Ali Baş Komandan cənab İlham Əliyevin komandanlığı altında qəhrəman Azərbaycan Ordusu bu tarixi ədalət bərpa edərək, Şuşanı əsl sahiblərinə qaytardı”.
Bunu “Ölkə.Az”a açıqlamasında Mili Məclisin Əmək və sosial siyasət komitəsinin sədri Musa Quliyev deyib.
Komitə sədrinin sözlərinə görə, Azərbaycan xalqı ötən 28 ildə Şuşanı bir an belə unutmadı və ümid içində yaşadı.
“Şuşanın işğal günü olan 8 mayı hüzn, kədər içində yaşadıq, ancaq ümidimizi itirmədik”, - millət vəkili qeyd edib.
Komitə sədri bildirib ki, Şuşanın işğaldan azad edilməsi, heç də asan başa gəlmədi: “Bu, cənab Prezidentin yürütdüyü məqsədyönlü siyasət nəticəsində mümkün oldu. Artıq Şuşa cənab Prezidentin sərəncamı ilə mədəniyyət paytaxtı elan edilib. Tarixi ədalət bərpa olunub və bir daha bu ədalət pozulmayacaq. Bax, ona görə də Azərbaycan xalqı qürurludur. Qürurludur ona görə ki, iğal altında olan torpaqlarına sahiblənib”.
Komitə sədri onu da bildirib ki, cənab Prezident və Birinci vitse-prezident dəfələrlə işğaldan azad olunmuş rayonlarda və Şuşada olub: “Bu gün Şuşanın işğaldan azad olunmasından 6 ay keçir və bu qısa müddətdə bütün işğaldan azad olan torpaqlarda olduğu kimi Şuşada da sürətli böyük abadlıq, quruculuq işləri gedir. Biz çox qısa zaman ərzində işğaldan azad olunan torpaqları cənnətə çevirəcəyik. Cənab Prezidentin dediyi kimi bu il Şuşada çox böyük mədəniyyət tədbirləri, “Xarı bülbül” beynəlxalq musiqi festivalı, Vaqif poeziya günləri keçiriləcək. Biz Şuşada digər beynəlxalq səviyyəli mədəniyyət, humanitar, siyasi tədbirlərin keçirilməsinin şahidi olacağıq. Şuşa qısa zamanda dünyanın mədəniyyət mərkələrindən və paytaxtlarından birinə çevrilərək, Qafqazın bir incisi olacaq.
Bu günləri görmək və şahidlik etmək Azərbaycan insanına xoşdur. Ona görə də bu xoş günləri bizə nəsib edən və bu yolda canlarından keçən şəhidlərimizi, yaralanan qazilərimizi, veteranlarımızı unutmamalı və onlara böyük qayğı göstərməliyik. Çünki bu qürurlu anları bizə yaşadanlar qəhrəman ordumuzdur. Onlara xidmət etmək və qayğısında qalmaq isə vəzifəsindən asılı olmayaraq hamımızın borcudur”.
Mürtəza
Ölkə.Az
