Mətn ölçüsü:
  • 100%

Deputat müharibə veteranlarının kommunal xərclərinin ödənməsini təklif etdi

"Milli Qurtuluş günü dövlətin qurulma tarixidir. 1992-ci ildə Ümumilli Lider Yeni Azərbaycan Partiyasının nizamnaməsində əsas prinsiplərdən biri kimi sosial ədalət məsələsi öz əksini tapıb. Biz bu gün onu yerinə yetiririk. Qanun layihəsi təqdirə layiqdir. Qeyd etmək istərdim ki, yenilikləri təqdim edəndə hər iki tərəfin maraqlarını nəzərə almalıyıq. Avropa standartlarına uyğun qanun qəbul ediriksə, əhalimizin buna hazırlığını da nəzərə almalıyıq".

"Ölkə.Az" xəbər verir ki, bunu parlamentin bu gün keçirilən plenar iclasında “Əlilliyi olan şəxslərin hüquqları haqqında” qanuna dəyişikliklərin müzakirəsi zamanı deputat Siyavuş Novruzov deyib.

Deputat deyib ki, 20 yanvar, Qarabağ şəhidləri, Çernobıl əlilləri və digər kateqoriyaya məxsus olan insanlara münasibət eyni olmalıdır. 

O, əlavə edib ki, Çernobıl hadisəsi zamanı minlərlə azərbaycanlı iştirak edib: “Əfqanıstan müharibəsində 8 min insan iştirak edib. Bu 8 mindən 3 mini Ümumilli liderin çağırışı ilə Ermənistanın işğalçılıq siyasətinə qarşı vuruşub. Eləcədə I Qarabağ müharibəsində 80 min insan iştirak edib, onun 15 min əlil olub, 11 mindən çoxu da şəhid olub.

Ümumilikdə Azərbaycanda bu kateqoriyaya aid olan 21500 nəfər əlil var. Son müharibə zamanı əlilliklə bağlı dəqiqləşdirmələr getdiyindən mən rəqəm açıqlamaq istəmirəm. Bunlar həssas təbəqədir. Onların yenidən yoxlamadan keçməsi əslində onları incidir”.

Komitə sədri bildirib ki, 2019-cu ildə prezident sosial sahədə böyük proqram təqdim edib və bunun üçün 3 miyard maliyyə ayırdı: “Prezident bu sahəyə xüsusi diqqət ayırır”.

Komitə sədri daha sonra bildirib ki, müharibə veteranlarına 80 manat kommunal xərclərin ödənməsi üçün müavinət verilirdi: “Hamısı da bunu fəxarət hissi ilə qeyd edirdi. Mən təklif edirəm ki, bu məbləği Çernobul əlillərinə verilən məbləğə-130 manata uyğunlaşdırılsın. Beləcə biz 100 min veteran və qazilərin kommunal problemini həll edə bilərik”.

S. Novruzov deyib ki, ümumilikdə əlillərinin sayının artmasında daha çox avtomobil qəzalarının və tikintidən təhlükəsizlik qaydalarına riyaət edilməməsi səbəbindən olduğunu açıqlayıb.

Mürtəza
Ölkə.Az