Politoloq: "Azərbaycan assosiativ sazişə imza atmaq niyyətini ortalığa qoymayıb"

Mayın 20-22-də Avropa Birliyinin (AB) Riqa şəhərində növbəti "Şərq tərəfdaşlığı" sammiti baş tutacaq.

Azərbaycan hökumətinin Riqa sammiti ilə bağlı atacağı addım maraqla gözlənilir.

Ölkə müxalifəti Riqa sammitində Azrbaycanın assosativ sazişə imza atmasının tərəfdarıdır. Digər tərəfdən isə assosativ sazişə indiki şəraitdə imza atmağın riskli olduğunu düşünənlər də çoxluq təşkil edir.

Bu məsələni Azərbaycan Prezienti Yanında Dövlət İdarəçilik Akademiyasının Siyasi Araşdırmalar İnstitutunun rəhbəri, politoloq, professor Elman Nəsirov Ölkə.az-a şərh edib.

Elman Nəsirov: "Azərbaycan dövlətinin milli təhlükəsizlik konsepsiyasında aydın şəkildə yazılıb ki, Azərbaycan avroatlantik məkana inteqirasiya xəttinə sadiqdir və onu həyata keçirir. Avroatlantik məkana prioritet istiqamətlərdən biri kimi baxırıq. Bu nöqteyi-nəzərdən Heydər Əliyev zamanında 1996-cı ildə Avropa iİttifaqı ilə əməkdaşlıq və tərəfdaşlıq sənədi imzalanmışdır. O zamandan bəri əlaqələrimiz inkişaf edir. Ancaq Azərbaycan Avropa İttifaqı ilə əlaqələrin inkişafında da, beynəlxalq təşkilatlarla əlaqələrində də, ayrı-ayrı dövlətlərlə münasibətlərində də ilk növbədə özünün milli maraqlarını ön plana çəkir, bu bir aksiomadır.

Azərbaycan Avropa İttifaqı ilə münasibətlərin inkişafında maraqlıdır, amma bu inkişaf təkamül yolu ilə yanaşır. Azərbaycan sıçrayışlı əməkdaşlığa heç zaman üstünlük vermir. Bu əməkdaşlığı həyata keçirərkən beynəlxalq kanyukturanı, regionda formalaşmış vəziyyəti və şübhəsiz ki, Azərbaycanın reallıqlarını və milli maraqlarını ön plana çəkir. Azərbaycan qonşu dövlət olan Gürcüstandan fərqli olaraq, eyni zamanda Ukraynadan, Moldavadan fərqli olaraq Avropa İttifaqı ilə əməkdaşlığı sıçrayışlı xətlə həyata keçirmir. Adı çəkilən dövlətlərin, xüsusi ilə də Ukraynanın Avropa İttifaqı ilə bağlı yeritdiyi siyasətin hansı hadisələrə gətirdiyi və Ukrayna üçün hansı fəsadlar törətdiyi heç kəsə sirr deyil.

Azərbaycan Avropa İttifaqı ilə münasibətdə ilk növbədə viza rejiminin sadələşdirliməsinə üstünlük verir. Proseslər getdikcə, əlaqələr inkişaf etdikcə, hər hansı bir mərhələdə assosiativ sazişlə bağlı məsələyə baxılması da mümkün ola bilər, ancaq hər şey proseslərin inkişafından, regional məsələlərdən, beynəlxalq kanyukturadan asılı olacaq. Azərbaycan dövləti "Şərq tərəfdaşlığı" çərçivəsində keçiriləcək Riqa sammitində iştirak etsə də təbii ki, assosiativ sazişə imza atmaq niyyətini ortalığa qoymayıb. Azərbaycan Avropa İttifaqı ilə əməkdaşlığı genişləndirmək və mərhələli şəkildə əlaqələri inkişaf etdirmək xəttinə sadiqdir.

Hansı qüvvələr ki, "Azərbaycan dərhal Ukrananın, Gürcüstanın atdığı addımları atsın" deyirlər, onlar real vəziyyəti qiymətləndirə bilmirlər. Çünki Ukraynanın son addımı nələrə səbəb oldu bəllidir, Gürcüstanın da belə bir addım atması heç də Avropa İttifaqının Cənubi Osetiya və Abxaziya torpaqlarını Gürcüstana qaytarması ilə nəticələnməyib. Əksinə, o torpaqlar daha çox Gürcüstandan uzaqlaşıb".

Səxavət Məmməd
Ölkə.az