Deputat: “Karantin rejimləri uşaqların zehni və fiziki sağlamlığına, psixoloji vəziyyətinə təsir göstərir”

“Koronavirus pandemiyası dövründə uşaq hüquqlarına diqqət çəkmək və bu vacib məsələni qaldırmaq sahəsində hazırlanmış yaxşı məruzədir. Çünki pandemiya hələ bitməyib. Bu vəziyyətdə necə yaşayacağımızı, necə sağ qalacağımızı, yaxınlarımızı necə müdafiə etməyimizi, sağlamlığımızı və əvvəllər alışdığımız həyat tərzini necə qoruyacağımızı öyrənirik. Əgər biz böyüklər üçün bu böyük problemdirsə, uşaqlar üçün bu böyük təhlükədir. Uşaqlar COVİD-19 pandemiyasının fiziki, emosional, psixoloji təsirlərindən əziyyət çəkirlər. Xüsusilə də  ölkələrdə tətbiq edilmiş təcrid olma, karantin rejimləri uşaqların zehni və fiziki sağlamlığına, təhsilinə, ailə mühitinə, psixoloji vəziyyətinə təsir göstərir”.

“Ölkə.Az”xəbər verir ki, bu fikirləri AŞPA sessiyasında müzakirə olunan “COVİD-19 pandemiyasının uşaq hüquqlarına təsiri” adlı məruzənin müzakirələri zamanı nümayəndə heyətimizin üzvü Sevinc Fətəliyeva deyib. 

Bildirib ki, pandemiyaya görə uşaqların təhsil almaq hüququ pozuldu. 

“Dünyadakı 200-ə yaxın ölkədə məktəblər bağlanıb, distant öyrənmə imkanı verən məktəblər ənənəvi məktəbləri əvəzləməyə başlayıb. Bəzi ölkələrdə uşaqların texnologiyalara və internetə normal çıxışının olmaması, təhsildə problemlərə səbəb olub. Məktəblər öyrənmə və təhsillə yanaşı, sosiallaşmanı təmin edir. Beləliklə, pandemiya uşaqların ünsiyyət bacarıqlarına da təsir edir”- o qeyd edib.

Azərbaycanlı parlamentari əlavə edib ki, zorakılığın artması pandemiya zamanı meydana gələn problemlərdəndir: “Karantin rejimləri zamanı uşaqlar ailə daxilində məişət zorakılığının şahidi oldular, psixoloji və fiziki zorakılığın qurbanı oldular. Uşaqlar, eləcə də yeniyetmələr təhsil, əyləncə və ya ünsiyyət üçün vaxtlarını internetdə keçirməyə başladılar və fərqli onlayn platformalardan istifadə rəqəmsal zorakılığın qurbanına çevrilmək təhlükəsini, eləcə də cinsi istismar, istismar və ayrı-seçkilik kimi təhdidləri artırır.  Ailə üzvləri arasında etimad itəndə və psixoloji yardım, eləcə də qorxularını bölüşəcək kimsə olmayanda  uşaqlar daha həssas və zəif olur”.

Deputat hökumətlərin qərarlarının ən çox kənarda qalan və həssas olan uşaqlar üçün mövcud bərabərsizlikləri daha da ağırlaşdırmaq təhlükəsi yarada biləcəyini qeyd edib:  “Yoxsulluqda və ya ən kasıb ölkələrdə və məhəllələrdə yaşayan uşaqlar, küçə uşaqları, mühacir, sığınacaq axtaran və qaçqın uşaqları və insan alveri və ya qaçaqmalçılıq qurbanları hamısı qeyri-mütənasib şəkildə əziyyət çəkəcəyini deyib. 

Pandemiyanın inkişafı ləngitdiyini, eləcə də son zamanlarda əldə edilmiş böyük irəliləyişləri alt-üst etdiyini vurğulayıb. Bildirib ki, dövlətlər COVID-19 pandemiyası zamanı həssas təbəqədən olanları qoruyan və onlara fayda verən yanaşmalara əsaslanmış uşaq hüquqları, uşaq hüquqlarına hörmət etmək, qoruyub saxlamaq və tam yerinə yetirmək səylərini artıran səmərəli cavab verməlidir. Bu mürəkkəb vəziyyətdə dövlətlər uşaqların qorunması və onların hüquqlarına daha çox diqqət yetirməli, səhiyyə, su, təhsil və doğum qeydiyyatı kimi təməl xidmətləri qoruyub saxlamalı və həssas vəziyyətdə olan uşaqları qorumaq üçün tədbirlər görməlidirlər. Bunun üçün əsas amil uşağın ən yaxşı maraqları olmalıdır”.

Mürtəza
Ölkə.Az