Mətn ölçüsü:
  • 100%

Qafqaz İslam Ordusu Azərbaycanı hansı böyük bəladan xilas edib…- Açıqlama

15 sentyabr 1918-ci ildə Nuru Paşanın rəhbərliyi altında Bakını erməni daşnak və bolşeviklərdən azad olması, təkcə bir şəhərin azad edilməsi kimi yox, bütövlükdə Azərbaycanın xilası  kimi dəyərləndirmək lazımdır.

Bunu “Ölkə.Az”a açılamasında deputat Məlahət İbrahimqızı deyib.

Deputatın sözlərinə görə, həmin dövrdə təkcə Bakı deyil, ümumiyyətlə, Azərbaycanın əksər bölgələri erməni daşnakları və bolşeviklərin zülmü altında inləyirdi.

“Azərbaycan türklərinə, müsəlmanlara qarşı kütləvi qətliamlar törədilib, soyqırımı siyasəti  həyata keçirilirdi. Erməni daşnakları havadarlarının dəstəyi ilə  bu soyqırımı siyasətini Naxçıvandan tutmuş Qarabağa, Şirvana, Lənkərana, Qubayadək həyata keçirirdi. Bu iyrənc siyasətin əsas hədəfi Azərbaycanı bir coğrafi məkan və ölkə kimi xəritədən silmək idi. Məhz belə bir çətin və mürəkkəb şəraitdə Nuru Paşanın rəhbərliyi altında Qafqaz İslam Ordusu qardaş dəstəyinə gələrək, bu çirkin niyyətləri və planları alt-üst etdi”, - o qeyd edib.

Deputat əlavə edib ki, Qafqaz İslam Ordusunun ölkəni erməni daşnak və bolşeviklərdən xilas etməsindən sonra o dövrdə yenicə qurulan Azərbaycan Xalq Cümhuriyyəti paytaxt Gəncədən Bakıya köçürürək ölkədə tam nəzarəti bərpa edə bildi: “Bildiyiniz kimi o vaxtadək AXC hökuməti Gəncədə yerləşirdi və erməni daşnaklar havadarlaırnın dəstəyi ilə hökumətin Bakıya  köçürülməsinə hər vəchlə maneçilik yaradırdı. İstər erməni daşnakları olsun, istərsə də digər imperialist güclər Azərbaycanı parçalayıb, siyasi xəritədən silmək üçün ən müxtəlif planlar qurmuşdular. Rus bolşevikləri neftlə zəngin olan Bakı və Abşeronu Azərbaycandan ayırıb özlərinə birləşdirmək istəyirdi. Ortada erməni daşnaklarının “böyük Ermənistan”, “dənizdən-dənizə” bir dövlət yaratmaq planları da var idi. Ancaq  Nuru və Ənvər Paşanın rəhbərliyi altındakı Qafqaz İslam Ordusu Azərbaycana gəlməklə təkcə xalqı üzləşdiyi fəlakətdən deyil, həm də Azərbaycan dövlətçiyini, ərazisini xəritədən silmək istiqamətindəki məkrli planlardan xilas etmiş oldu.  Bax ona görə də biz 15 sentyabr 1918-ci ildə Bakının erməni daşnakları və bolşeviklərdən azad edilməsinə bu prizmadan baxıb, hadisələrə daha geniş miqyasda  qiymət verməyi bacarmalıyıq. O zaman  biz 15 sentyabrın Azərbaycan tarixi üçün necə əhəmiyyətli bir gün və tarixi gün  olduğunu dərk edə bilərik.

Düzdür,  SSRİ dövründə bu tarixi bizə unutdurmağa çalışdılar, ancaq bacarmadılar. Bu xalqın genetik yaddaşına hopmuşdu. Xalq açıq şəkildə büruzə verməsə də yaddaşında saxlayırdı və unutmurdu. Hətta o zaman nənəm mənə belə bir bayatı deyirdi:

Qoşun gəlir baş-başa,
İçində Nuru Paşa 
Yaman günə qalmışdıq 
Səni görüm min yaşa!

Qorxa-qorxa qulağımız bizim türk olduğunuzu anladırdılar.  Bütün çətinliklərə baxmayaraq, bax belə yaşadıldı o şanlı tarix”.

Deputat onu da bildirib ki, o zaman Osmanlı Türkiyəsi özü çox mürəkkəb bir vəziyyətlə üz-üzə idi, üzərində qara buludlar dolaşırdı: “Birinci Dünya Müharibəsinin nəticələrinə əsasən Osmanlı Türkiyəsi ölum-qalım mübarizəsi aparırdı. Amma belə bir çətin və mürəkkəb şəraitə baxmayaraq  qardaş müraciətinə biganə yanaşmayıb, dərhal yardıma yetişdi və Azərbaycanı düşmənlərdən xilas etdi. Bunu ancaq qardaş qardaş edə bilərdi. Bunu dar günün dostu edə bilərdi. Çünki dost və qardaş dediyin çətin günlərdə sınanar. Çətin günlər dostları yaxın edər. Bax budur Azərbaycan-Türkiyə qardaşlığının  və birliyinin kökündə dayanan məsələ.  Azərbaycan və Türkiyənin birliyi, həmrəyliyi, qardaşlığı və dostluğu tarixin çətin sınaqlarından çıxaraq özünü doğruldub. Ona görə də qardaşlıq telləri sarsılmazdır. Biz bunu təkcə 1981-ci ildə deyil,  sonrakı dövrlərdə də şahidi olduq. Ermənistanın Azərbaycana qarşı işğalçılıq dövründə və 2020-ci ildə torpaqlarımızın erməni faşistlərdən azad edərkən bariz şahidi olduq.  Türkiyə hər zaman olduğu kimi Qurtuluş savaşında da  Azərbaycanın yanında olub, həmrəylik nümayiş etdirdi. Azərbaycanı özünə dost hesab edən çox ölkələr var idi. Amma 2020-ci ilin sentyabrında başlanan Qurtuluş savaşında Türkiyə və Pakistan birmənalı şəkildə siyasi, mənəvi dəstək verib. Həmrəylik nümayiş etdirdi. Odur ki biz bu tarixin əhəmiyyətini bilməli, onu dəyərləndirməli və gələcək nəsillərə ötürməliyik.  Biz bu qardaşlığın daha da möhkmələnməsi üçün əməli fəaliyyət göstərməliyik. Ancaq birliyimiz nəticəsində bütün çətinlikləri dəf edə bilərik.  Biz heç zaman bizə belə şanlı, şərəfli tarixi yaşadanları unuda bilmərik. Bu yolda indiyədək canlarından keçərək şəhid olaraq bizə əmanət qoyduqları Vətənə görə baş əyirik. Həyatımızı bizə zəfərlər, qələbələr yaşadan qəhrəmanlarımıza, qazilərmizə və şəhidlərimizə borcluyuq. Yaşasın Azərbaycan Türkiyə birliyi bə qardaşlıq!”.

Mürtəza
Ölkə.Az