Mətn ölçüsü:
  • 100%

\"Bu ölkələr qarşısında sadəcə Azərbaycanı yox, Türkiyə və Pakistanı da görəcək\" - ŞƏRH

Türkiyə Prezidenti Rəcəb Tayyib Ərdoğanın azərbaycanlı generallarla görüşməsi, ümumiyyətlə, bu tipli görüşlərin keçirilməsi tamamilə normaldır. Çünki nəzərə alsaq ki, son dövlər Azərbaycan hər iki tərəfdən təzyiqə məruz qalır. Belə desək, sendviç kimi sıxılır. Həmin o ölkələr istər şimal, istərsə də cənub qonşumuz Azərbaycana qarşı heç də xoş olmayan münasibət sərgiləyir. 

Bu sözləri Ölkə.Az-a açıqlamasında siyasi şərhçi Turab Rzayev deyib. O, Qarabağda müvvəqqəti missiya həyata keçirən Rusiya sülhməramlılarının davranışlarını və İran tərəfinin açıqlamalarını xatırladıb:

“Onsuz da Qarabağdakı sülhməramlılar öz missiyasını aşan hərəkətlər edirdilər. Sülhməramlıların müvəqqəti nəzarətində olan ərazilərdə lokal toqquşma xəbərləri eşidirik. Bu baxımdan belə görüşlərin olması kifayət qədər təbiidir. Hazırda şimal və cənubdan Azəbaycana qarşı olan təzyiqlər pik həddədir. Biz Rusiyanın açıq təzyiqlərini hiss edirik. Sülhməramlılar öz missiyasına aid olmayan fəaliyyətlər həyata keçirirlər. Digər tərəfdən sülhməramlıların yeni komandiri, Abxaziya cəlladı, Azərbaycan ərazisinə gəlməli olan şəxs Ermənistanda rəsmilərlə görüşür, ATƏT-in həmsədri gedib separatçı Arutyunyanla görüşür. Bundan başqa biz görürük ki, İranın təxribatları davam edir, Xəzərdə Türkiyə-Azərbaycan ortaq təlimlərlə bağlı əleyhimizə açıqlamalar davam edir. Bundan əlavə, İrandan Ermənistana strateji məhsullar daşınmasının davam etdiyini görürük.  Hətta bununla bağlı bir neçə dəfə narazılıq olub. Bir neçə dəfə Gorus-Qafan yolunu bağlamışıq. Bütün bunların fonunda keçirilən hərbi təlimlər əslində düşmənə göz dağıdır. Türkiyə ilə bir neçə, həmçinin Türkiyə, Azərbaycan və Pakistanın birgə təlimləri oldu.  Hətta Türkiyə ilə quru təlimləri cəbhə bölgəsində - Laçın rayonunda keçirildi”.

264891

Ekspert bildirib ki, Azərbaycanla Türkiyyənin və Azərbaycan-Türkiyə-Pakistan hərbi təlimləri və yüksək səviyyəli görüşlər bu dövlətlərin Azərbaycana açıq dəstəyini nümayiş etdirməsidir:
“Bu, əslində, Türkiyə və Pakistanın Azərbaycana birbaşa açıq dəstəyidir. Yəni hər hansı bir bədnam xarici qüvvənin Azərbaycan əleyhinə mənfur planı varsa, onu həyata keçirmək istəyərkən 2 dəfə düşünsün. Qarşısında sadəcə Azərbaycanı yox, eyni zamanda Türkiyə və Pakistanı görəcəyini də başa düşsün. Bilsin ki, Azərbaycana təzyiq etmək, Azərbaycanın suveren hüquqlarına toxunmağa cəhd etmək və ya hansısa şəkildə burada təxribat törətmək o qədər də asan bir şey deyil. Bu görüşlər və s. buna hesablanmış mesajlardır. İrana nota verildikən sonra İranın ölkəmizdəki nümayəndəsi prezident aparatına dəvət olundu. Orda müəyyən izahlar edildi. Daha sonra İran Xəzərdəki təlimlərə etiraz etdi. Ardınca bizim müdafiə naziri və baş qərargah rəisi Türkiyədə rəsmi səfərdə oldular. Bu, əslində göstərir ki, biz sülh və qonşuluq şəraitində yaşamağa hazırıq. Amma siz davamlı olaraq Qarabağdakı erməni separatçılarına və Ermənistana silah, yanacaq və digər materiallar göndərilməsi şəraitində artıq bunun cavabı hərbi olacaq. Və biz artıq bu məsələyə dözmək fikrində deyilik. Bu eyni vaxtda Rusiyaya da açıq mesajdır”.

T.Rzayev Türkiyənin regionda NATO təmsilçisi kimi çıxış etməsi ilə bağlı səsləndirilən fikirlərə də münasibət bildirib: 

“Xəritəyə baxsaq görərik ki, Rusiya ilə NATO-nun strateji maraqlarının kəsişmə nöqtələri var. Ukrayna, Krım, Qaradəniz, Qarabağ bölgəsi, Gürcüstanda Abxaziya və Osetiya, Aralıq dənizi, Suriya, Liviya, Balkanlar, Rusiya ilə NATO-nun strateji kəsişmə nöqtələridir. Eyni vaxtda bu ərazilər həm də Türkiyə ilə Rusiyanın da kəsişmə nöqtələridir. Rusiya Yaxın Şərqə doğru - Suriya, Livan ərazisinə doğru yol açmaq istəyir. Rusiya eyni vaxtda Türkiyəni də mühasirəyə salmaq istəyir. Türkiyənin burada NATO üçün nə qədər əhəmiyyətli olduğu bir daha üzə çıxır. Əgər NATO ilə Türkiyənin maraqları eynidirsə, Türkiyə əlbəttə ki, burada NATO-nun maraqlarını qoruyacaq. Hazırda Türkiyə bu məsələdə özünü sərbəst oyunçu kimi aparır.
Bu bölgənin gələcəyini Azərbaycan-Türkiyə-Pakistanittifaqının nəzarətində görürəm. Yəni həm Yaxın Şərq, həm Mərkəzi Asiyanın gələcək taleyi bu tandemdən ibarət olacaq. Bu ittifaqda əsas hərbi güc baxımından Türkiyə, iqtisadi güc baxımından Pakistan, strategiya müəyyən etmək gücündə isə Azərbaycan kifayət qədər rol oynaya bilər. Bunu görən həm bəzi regional qüvvələr, həm də onlarla əməkdaşlıq edən qlobal dövlətlər narahat olurlar”.

Billurə Yunus