Fazil Mustafa: “Elmdə plagiata yol verənlər məsuliyyətə cəlb olunmalıdır”

 Bunu “Ölkə.Az”a açıqlamasında deputat Fazil Mustafa deyib.

Onun sözlərinə görə, ona görə son illərdə plagiatlığın inkişaf etməsi elmi inkişafa əngəl olan əsas məsələlərdən biridir. 

“Hamı əhəmiyyətsiz tədqiqat dəyəri olmayan  mövzuları  seçməyə üstünlük verir. Çox az sayda  fundamental tədqiqat əsərlərinə rast gəlinir. Bu da  gələcəkdə  elmi potensialın zəifləməsinə şərait yaradan amildir”, - deputat qeyd edib.

O əlavə edib ki, yaranmış durumu nəzərə alaraq ölkədə elmin inkişafına indidən diqqət yetirmək lazımdır: “Azərbaycan elminin son  müstəqillik  dövrü başdan ayağa  elmdə plagiatlığın çiçəkləndiyi dövrü hesab etmək olar. Plagiatlıq  aşkar olunandan sonra  görüm-baxımla "kimin adamıdır" prinsipi ilə məsələyə yanaşılır.  

Ali Atesstasiya Komissiyasının da disertasiyanı ləğv etməsi, heç də bu sahədə  sağlam mübarizənin aparmasından xəbər vermir. Çünki çox sayda belə  faktlar var.  Bu cür faktlara qarşı mübarizə aparmaq lazımdır”.

Bu sahədə ciddi dəyişiklik əldə olunması üçün deputat təklif edib ki, məsələyə obyektiv yanaşılması və ciddi cəza mexanizmi tətbiq edilməlidir: “Cinayət hadisəsi kimi palgiatlığa yol verənlər məsuliyyətə cəlb olunmalıdır. Məsuliyyət məsələsi gündəmə gəlməli, qanunvericilik təkmilləşirilməli və məsələ  öz əksini tapmalıdır. Digər tərəfdən isə elmin inkişafı sahəsində ciddi islahatlar həyata keçirilməlidir”.

Mürtəza
Ölkə.Az