Mətn ölçüsü:
  • 100%

Prezidentin köməkçisi: “Türk dövlətləri bütün beynəlxalq arenalarda bir-birini dəstəkləyirlər”

Türk Şurası Azərbaycanın sədrliyi dövründə daha da təşkilatlanaraq, sıralarını genişləndirdi və beynəlxalq arenada uğurlar əldə edərək mövqeyini möhkəmləndirdi.

 “Ölkə.Az” xəbər verir ki, bunu Prezidentin köməkçisi Hikmət Hacıyev Türkiyədə keçirilən Türk Şurası Media Forumunda çıxışı zamanı deyib.

Onun sözlərinə görə, bu gün Türk Şurasına üzv ölkələr arasında bütün sahələrdə  əməkdaşlıq mövcuddur.  

“İlk növbədə onu qeyd edim ki, siyasi sahədə əlaqələr nəticəsində üzv dövlətlər bir-birini bütün beynəlxalq arenalarda dəstəkləyirlər.  

2019-cu ildə TŞ-nin Bakı sammitində cənab Prezident İlham Əliyev bəyan etdi ki, Azərbaycanın sədrliyi  dövründə  təşkilatın daha da inkişaf etməsinə töhfə verməyə hazırdır və bu istiqamətdə əzmini ortaya qoyub.  Məmnunluqla deyə bilərəm ki, Azərbaycan sədrliyi dövründə  əməkdaşlıq sahəsi genişləndi və Özbəkistan qurumun tam hüquqlu üzvü oldu, Türkmənistan isə müşahidəçi qismində iştirak etməyə başladı. 

Eyni zamanda dünya  ölkələri TŞ ilə əməkdaşlıq etməyə maraq göstərməyə başlayıb və bu ölkələrin sayı artmaqdadır”, - Hacıyev qeyd edib.

Hacıyev onu da əlavə edib ki, Azərbaycanın sədrliyi dövründə, 2020-ci ildə ölkəmizi üçün çox mühüm hadisələrlə yadda qalan il oldu: “Xalq cənab Prezidentin ətrafında sıx birləşərək "Qarabağ Azərbaycandır!" şüarı altında Vətən müharibəsinə başladı və 30 illik  işğala son verdi. 

Fürsətdən istifadə edib, Türkiyəyə, Azərbaycanın haqq savaşında sonadək yanında olub, siyasi, mənəvi dəstək verdiyi üçün başda cənab Prezident Ərdoğan başda olmaqla  hamıya təşəkkürümüzü bildiririk. O dövrdə bütün Türkiyənin nəbzi Azərbaycanla döyünürdü. 44 günlük Vətən müharibəsi dövründə  TŞ-yə üzv ölkələr, başda baş katib Amir olmaqla  dəstəklərini əsirgəmədilər. Biz o dövrdə Tük dünyasının sosial  mediasının Azərbaycana dəstək olduğunun şahidi olduq. Bu bizi qürurlandırdı. Mən burada qardaş türk mediasının göstərdiyi dəstəyi deməsəm haqsızlıq olar. Başda Fəxrəddin Altun olmaqla təxribatçılara qarşı birgə çiyin-çiyinə mübarizə aparıb informasiya müharibəsində də  qalib  gəldik. Bütün addımlarımızı birgə atdıq. Cənab Prezident İlham Əliyev Şuşa Bəyannaməsinin imzalandığı gün Türkiyə mediasının Azərbaycanın haqq səsinin dünyaya yayılmasında oynadığı  rola görə təşəkkürünü bildirdi.
Biz TŞ olaraq  iqtisadi, ticari əlaqələrimizi genişləndiririk. Xüsusilə bir məqamı qeyd etmək istəyirəm ki, 2020-ci ildə dünya pandemiyadan əziyyət çəkən zaman beynəlxalq təşkilatların qərar verməkdə çətinlik çəkdiyi bir dövrdə TŞ  ilk beynəlxalq təşkilat olaraq Zirvə toplantısı keçirib məsələ ilə bağlı mövqeyini ortaya qoydu. Bu, əslində dünyaya bir nümunə idi. Hansı ki bunu digər beynəlxalq təşkilatlar etməli idi, amma TŞ olaraq etməyi bacardıq.  Bu dövrdə ölkələrimiz arasında iqtisadi, ticari əlaqələr dayanmadı və dəyişmədi”. 

Mürtəza
Ölkə.Az