Rusiyanın mövqeyi Azərbaycanın beynəlxalq arenada nüfuzunu göstərdi - RƏY

“Zaman keçdikcə Azərbaycanın 44 günlük müharibədən sonra Cənubi Qafqaz bölgəsində yaratdığı yeni reallıqlar regional əməkdaşlıq, təhlükəsizlik və interqasiya baxımından nə qədər mühüm əhəmiyyət kəsb etdiyi dünya birliyi tərəfindən  qəbul edilib, dəstəklənməkədir. Biz bunun son İran və Azərbaycan arasındakı məlum olaylar zamanı bir daha şahidi olduq. Cənab Prezidentin güclü Azərbaycanın qurulması ilə bağlı gələcəyə hədəflənmiş düzgün strategiyasının öz bəhrəsini verməkdədir”.

Bunu “Ölkə.Az”a açıqlamasında deputat İltizam Yusifov deyib.

Onun sözlərinə görə, bölgənin və dünyanın  əksər ölkələri  bölgədə yaranan yeni reallıqların şərtlərinə uyğun siyasətini qurduğu bir anda, bəzi ölkələr Azərbaycanın  qələbəsini və bölgədə aktor roluna çevrilməsindən narahatlıq keçirərək bu proseslərə  qarşı çıxaraq maneçilik törətməyə çalışırlar. 

“Amma bölgədə dayanıqlı sabitliyin, inkişafın təmin edilməsi istiqamətində həyata keçiriləcək proseslər geriyədönməz prosesdir və buna qarşı çıxanlar mütləq fiaskoya uğrayacaqlar. Biz bunu İran timsalında şahidi olduq. İranın bölgədə  gərginliyin davam etməsinə yönəlik  cəhdləri cənab Prezidentin yürütdüyü düzgün hədəflərə xidmət edən siyasəti nəticəsində iflasa uğradı. Təkcə bölgədə deyil, dünyada böyük güc olan Rusiya, Türkiyə  Azərbaycanın mövqeyini dəstəkləyərək, onun yanında yer aldılar. Bu bir daha Azərbaycanın  beynəlxalq arenada nüfuzunun və güclü ölkə olduğunu ortaya qoydu”, - deputat qeyd edib.

O əlavə edib ki, istər RF prezidenti Vladimir Putinin “Valday” klubundakı çıxışı, istər Türkiyə Prezidenti Ərdoğanın son Cənubi  Qafqazdakı proseslər, xüsusən də Zəngəzur dəhlizi ilə bağlı açıqlamaları Azərbaycanın  bölgədə yaratdığı reallığı qəbul edilməsi və dəstəklənməsi kimi qiymətləndirilməlidir. “Rusiya prezidenti Putin “Valday”da bəyan edib ki, Azərbaycan Naxçıvanla kommunikasiya əlaqəsi yaratmaqda maraqlıdır və bu  məsələnin reallaşması Ermənistanın qarşısında duran əsas vəzifədir. RF prezidenti də hesab edir ki, bölgədə dayanıqlı sabitliyin təmin edilməsi kommunikasiyaların açılması və qarşılıqlı normal əlaqələrin qurulmasından keçir. Cənab Ərdoğan da Zəngəzur dəhlizinin açılmasının zəruriliyini və buna qarşı çıxan İranın hərəkətinin yanlış olduğunu açıq mətnlə bəyan etdi.

Digər tərəfdən RF XİN sözçüsü Mariya Zaxarovanın rus şirkətlərinin işğaldan azad olunmuş Azərbaycan torpaqlarının yenidən qurulması prosesində yaxından iştirak etməsi və “3+3” ideyasının tezliklə işə düşməsinin tərəfdarı olması barədə verdiyi açıqlamalar Prezident İlham Əliyev tərəfindən irəli sürülən təşəbbüslərin nə qədər böyük regional əhəmiyyətə malik olduğunun göstəricisidir. 

Bütün bunlar hələ bir müddət öncə Prezident İlham Əliyevin “kimlərinsə istəyindən asılı olmayaraq Zəngəzur dəhlizi reallaşacaq” haqqında verdiyi bəyanatın beynəlxalq dəstəyi və cavabı kimi dəyərləndirilməlidir. Çünki  Azərbaycan və Türkiyənin  bölgənin gələcəyi ilə bağlı irəli sürdüyü Zəngəzur dəhlizi və “3+3” formatındakı əməkdaşlıq ideyası təkcə bölgə ölkələrinin deyil, bölgəyə yaxın və digər region ölkələrinin, Avropadan Uzaq Şərqədək bütün ölkələrin marağına xidmət edir. Bu layihələr eyni zamanda buna qarşı çıxan ölkələrin maraqlarına xidmət edir. Çünki həmin ölkələr də bu layihədən faydalanıb, Şimal-Cənub, Qərb-Cənub, Qərb-Şərq istiqamətdəki yükdaşımalardan istifadə edəcəklər”, - deputat bildirib.

Deputat onu da bildirib ki, Azərbaycanın bu günə kimi yürütdüyü siyasət və regional təşəbbüsləri  bölgə xalqlarının rifah halının yaxşılaşmasına, dünya ölkələri ilə sıx əməkdşalığın yaranmasına xidmət edib: “Azərbaycanın təşəbbüsü ilə reallaşan iri enerji, iqtisadi, logistik, yükdaşıma ilə bağlı reallaşdırdığı layihələrdən təkcə bölgə ölkələri deyil, eyni zamanda qonşu region və uzaq ölkələrə belə faydalanıb və faydalanmaqdadır. Azərbaycanın bölgədə yaratdığı yeni reallıqların şərtlərinə uyğun olaraq irəli sürdüyü təşəbbüslər də, bundan öncəki layihələr kimi bölgə xalqlarının rifah halının yaxşılaşmasına, o cümlədən regional inteqrasiya, bölgə ilə qonşuluqda olan digər dövlətlərlə, beynəlxalq səviyyəli iqtisadi təşkilatlarla əməkdaşlığın inkişaf etdirilməsinə öz müsbət töhfəsini verəcək”.

Mürtəza

Ölkə.Az

QEYD: Bu material MEDİA Agentliyinin maliyyə yardımı əsasında "Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi" mövzusu ilə əlaqədar dərc olunub.