Hərbi ekspert: "Ordumuzun arsenalında daha sanballı silahlar var..."

Rusiyanın "Uralvaqonzavod" Dövlət Konserni Azərbaycanın sifariş verdiyi 100 ədəd T-90S tanklarının hamısını Müdafiə nazirliyinə təhvil verib.

Azərbaycan ordusunun güclənməsi, yeni silahlar alması təbii ki, düşmənimiz olan Ermənistanı ciddi narahat edir.

Azərbaycan ordusunun modernizasiyası məsələlərini və bunun bölgədəki güc balansına necə təsir etməsini ehtiyatda olan polkovnik-leytenent, hərbi ekspert İbrahim Rüstəmli Ölkə.az-a verdiyi açıqlamasında şərh edib.

İbrahim Rüstəmli: "İlk növbədə onu vurğulayım ki, Azərbaycanın Rusiyadan aldığı T-90S (bundan sonra T-90 - İ.R.) tankları bu ölkədə istehsalı olunan 3-cü nəsil müharibə tankı sayılır. Onların istehsalı T-72-ləri əvəz etmək məqsədi ilə həyata keçirilir. Çünki Körfəz müharibəsində T-72-lər ABŞ-ın Abrahams M1A1 tanklarına qarşı müvəffəqiyyətsiz çıxışı ilə yadda qaldı. Hazırda T-72BM tankının yüksək texnologiya məhsulları ilə təchiz olunmuş T-90-lar T-80-dən alınan aktiv zirehə malikdir və daha güclü mühərrikə sahib olub digər Rusiya tankları kimi alçaq profillidir.

Ən əsası, Rusiyanın «Uralvaqonzavod» Elmi İstehsalat Müəssisəsi tərəfindən istehsal edilən T-90-lar Tank Əleyhinə İdarə olunan Raket (TƏİR) kompleksinə malikdir. Bu da 5 km. uzaqlıqda olan düşmənin istənilən zirehli texnikasını 100 faiz dəqiqliklə məhv etmək imkanı yaradır.

T-90-ın avtomatik dolub-boşalan 2А46М-5 topu TƏİR raketlərindən başqa zirehdeşən, beton istehkamları dağıdan və s. xüsüsiyyətə malik müsair mərmiləri dəqiqliklə ata bilir.

Gecə-gündüz görüntüsünə malik optik lazer-nişangahı isə hətta hərəkətdə olarkən ona hədəfi nişan almaq və ya nişangahı hədəf üzərində saxlamaq imkanı yaradır.

Tank üzərində quraşdırılan “Kord” pulemyotu isə hava hədəflərinin məhv edilməsində kifayət qədər ciddi silah kimi xarakterizə olunur.

Rusyadan aldığımız tanklar, T-90-nın ən yaxşı modifikasya olunmuş növü sayılır. Sürəti düz yolda 65 km/saat-dır ki, bu da 46,5 - 50 ton ağırlığında olan texnika üçün yüksək göstərici sayılır. O, birbaşa 375 km, əlavə yanacaq ehtiyatı ilə 550-650 km-dək məsafəni qət etmək üstünlüyünə malikdir.

Əlbəttə, bu cür yüksək texniki-taktiki imkanlara malik zirehli texnikanı kütləvi şəkildə silahlanmaya daxil etmək Azərbaycan ordusu üçün önəmli sayıla bilər. Lakin bunun özü də Silahlı Qüvvələrimizin döyüş imkanlarının daha da gücləndirilməsində bu gün artıq epizodik xarakter daşıyır. Çünki hazırda Azərbaycanın silah arsenalında T-90-dan yüz dəfələrlə artıq manevr imkanları ilə yüklənmiş daha müasir, daha sanballı silahlar dayanır. Əgər döyüş meydanlarında söz bu silahlara verilsə, inanmıram ki, T-90-ların çıxışına ehtiyac qalsın..."

Səxavət Məmməd
Ölkə.az