Deputat AŞPA-da Xocalı soyqırımından danışdı
Avropa Şurası Parlament Assambleyasının (AŞPA) yay sessiyasının bugünkü plenar iclasında Bosniya və Herseqovinanın Rəyasət Heyətinin sədri Mladen İvaniç bu ölkənin Avropa Şurası Nazirlər Komitəsinə (AŞNK) sədirliyi çərçivəsində Assambleyada çıxış edib və Avropalı parlamentarların suallarını cavablandırıb.
Azərbaycanın AŞPA-dakı nümayəndə heyətinin üzvü Qənirə Paşayevanın “Siz iki həftə əvvəl Azərbaycanda səfərdə idiniz və prezident İlham Əliyevlə önəmli müzakirələriniz oldu. Bizim ölkəmiz, Azərbaycan Bosniya və Hersoqovina ilə dostluq münasibətləri içərisində bir çox ortaq layihələr həyata keçir və şadıq ki, iki dost ölkə olaraq əməkdaşlığımız daha da genişlənir.
Və Bosniya və Herseqovinaya Parlament Məclisinin yuxarı palatası olan Xalqlar Palatasının 26 fevral 2013-cü il tarixli iclasında mütləq səs çoxluğu ilə Ermənistanın Azərbaycana təcavüzü və Xocalı soyqırımına dair rəsmi sənəd – “Azərbaycan Respublikasının suverenliyinin və ərazi bütövlüyünün tanınması və hörmət olunması” barədə qəbul etdiyi qətnamə üçün təşəkkürümü bildirərək soruşmaq istərdim ki, sizin ölkənizin Nazirlər Komitəsinə sədrliyi dövründə bu məsələnin, Dağlıq Qarabağ probleminin həlli istiqamətində fəal rol oynayacağını gözləmək olarmı?" sualına cavab verən Mladen İvaniç deyib.
“Biz həm Azərbaycan, həm də Ermənistanla dostluq münasibətləri qurmağa çalışırıq. Hər iki ölkə ilə bizim çox yaxşı münasibətlərimiz var. Mən bu yaxınlarda Bakıda oldum, Avropa Oyunlarının açılış mərasimində iştirak etdim. Azərbaycan bizim ölkəmizə sərmaya qoyur, burada yaşayan müxtəlif xalqların nümayəndələrinin işə cəlb olunması ilə bağlı bir neçə layihəni dəstəkləyir. Bu çox yaxşı bir addımdır. Biz hər iki ölkə ilə aramızdakı əlaqələri daha da möhkəmləndirmək istəyirik. Hesab edirəm ki, biz, tariximizdə müxtəlif münaqişələrlə qarşılaşmış kiçik bir ölkə olaraq bəlkə də bu münaqişənin həllində öz köməyimizi göstərə bilərik.
Ola bilər ki, kiçik ölkələr hansısa hazır həll variantını təqdim etmək üçün elə də qüvvətli olmasınlar, amma belə məsələlərdə biz öz təcrübəmizi təqdim etməklə bəlkə də öz töhfəmizi verə, tərəflərə öz yardımımızı göstərə bilərik. Amma münaqişənin tam şəkildə həll edilməsi əlbətdə ki hər iki ölkənin öz üzərinə düşən bir yükdür. Heç kim onlara zorla onların boynuna hansısa həll variantını qoya bilməz, onlar özləri buna nail olmalıdırlar.
Üstəlik, Bosniya və Hersoqovina da bir şey edə bilməz, bizim ölkə elə də böyük təsirə malik deyil. Biz hər iki ölkə ilə aramızdakı çox yaxşı olan bu əlaqələri inkişaf etdirməkdə davam edəcəyik, eyni zamanda, iki ölkə arasındakı əlaqələrin nizamlanması üçün ən yaxşı həll variantını tapmaq istiqamətindəki axtarışlarda öz töhfəmizi verməyə də çalışacağıq”. (qafqazinfo)
Ölkə.Az
