Partiya sədri: \"Rusiya israrla Sərkisyana Yanukoviçdən dərs çıxarmağı məsləhət görür\"

Ermənistanda iyunun 19-dan başlayan etiraz aksiyası davam edir.

Sarkisiyan rejimi aksiya iştirakçılarına qarşı güc tətbiq etməkdən çəkinmir. Yayılan xəbərlərə görə Sarkisiyan Qarabağda yerləşənn ordunun bir hissəsini də İrəvana gətirir.

Ermənistanda baş verən olayları millət vəkili, Ümid Partiyasının sədri İqbal Ağazadə Ölkə.az-a şərh edib.

İqbal Ağazadə: "Ermənistanda baş verən hadisələr sosial partlayışdan yaranıb. İşıq və elektirik enerjisinin qiymətinin artırılması əhali arasında ciddi narazılıqlar doğurub. Sosial problemdən başlayan narazılıqlar bəzən bütövlükdə hakimiyyətə qarşı çevrilir və hakimiyyətin dəyişməsi ilə nəticələnir. Bu aksiyalarada Rusiyadan qopma, Avrointeqrasiya, Ermənistanın siyasi kursunun dəyişdirilməsi kimi çağrışlar səsləndirilir. Bunlar da kifayət qədər ciddi faktordur və region üçün olduqca faydalıdır. Aksiya iştirakçılarının Sarkisiyanın əleyhinə qaldırdığı plakatlara baxdıqda görərik ki, orada Azərbaycan dilində də plakatlar var. Bu o deməkdir ki, yerliçilik amilində də Ermənistanda kifayət qədər ciddi problemlər var. Dağlıq Qarabağdan, Azərbaycandan olan ermənilərin Ermənistana gedərək haimiyyəti ələ keçirməsinə qarşı səslənən şüarlar onu göstərir ki, yerli və gəlmələr arasında ciddi problemlər yaranıb.

Rusiya israrla Ermənistana Yanukoviçdən dərs çıxarmağı məsləhət görür. Hadisələri hətta qanlı məcrada belə yatırtmağa çağırır. Bizlər və Qərb dünyası bu fikirlərdən yararlanaraq Ermənistanda mitinqçilərə dəstək verməyin yolunu aramalıdır. Qərb dünyası Rusiyanın əleyhinə olan qüvvənin hakimiyyətə gəlməsinə maraqlı olmalıdır ki, cənubi Qafqazadan Rusiya çıxsın.

Hərbçilərin İrəvana çağırılması məsələsinə gəldikdə isə bu, problemi daha da kəskinləşdirilən amillərdən ola bilər. Bu da Ermənistanın növbəti dövr üçün vəziyyətini ağırlaşdırar. Hətta ordu xalqın tərəfinə də keçə bilər. Ermənistanda Rusiyanın əleyhinə olan fikir və düşüncənin bu gün meydanlara daşınması pozitiv məqamdır".

Səxavət Məmməd
Ölkə.az