Hərbi ekspert: "Ordumuz yaxın illərdə dünyanın ən inkişaf etmiş orduları sırasında olacaq"

Bu gün Azərbaycan Silahlı Qüvvələrinin yaranmasının 97 ili tamam olur.

Müstəqilliyimizin ilk illərinə məğlubiyyətlə başlayan ordumuz artıq böyük inkişaf yolu keçib və regionun ən güclü ordularından biri kimi dəyərləndirilir.

Hərbi ekspert Üzeyir Cəfərov Azərbaycan Silahlı Qüvvələrinin durumu haqqındakı fikirlərini Ölkə.az-la bölüşüb.

Üzeyir Cəfərov: "Azərbaycan silahlı qüvvələrinin bütün şəxsi heyətini təbrik edirəm. Bu gün ön xətdə dayanan bütün əsgər və zabitlərimizi təbrik edirəm. Ordumuz əlbəttə ki, 90-cı illərin ordusu deyil. Bu illər ərzində inkişaf var, irəlləyiş var, ancaq xeyli görüləsi işlər də var. Birinci növbədə kadr potensialı daha müasir tələblərə cavab verməlidir. Ordumuzda neqativ hallar aradan qaldırılmalıdır. Düşünürəm ki, Azərbaycan silahlı qüvvələri regionun deyil, yaxın illərdə dünyanın inkişaf etmiş orduları sırasında olacaq. Buna həm insan resursları həm də silah-sursatımız imkan verir. Azərbaycan kifayət qədər potensiala və imkanlara malikdir, bizə qalan tək şey o imkanlardan düzgün istifadə etməkdir.

Azərbaycan ordusunun üzərinə düşən əsas vəzifə işğal altındakı torpaqlarımızı geri qaytarmaqdır. Çox arzu edirəm ki, ordumuzun növbəti bayramını işğal altındakı torpaqlarımızda keçirək".

Səxavət Məmməd
Ölkə.az