Aydın Hüseynov: \"Görünür “beşinci kolon” yenə xaricdən sifariş alıb\"
“2020-ci il 44 günlük Vətən müharibəsində tarixi zəfər qazanaraq, torpaqlarını işğaldan azad edən Azərbaycan postmüharibə dövründə də uğurlu addımlar atır. Artıq yaxın və uzaqda yerləşən ölkələr Azərbaycanın bu qələbə nəticəsində yaratdığı reallıqları qəbul edir,ölkəmizlə əməkdaşlığı daha da dərinləşdirirlər. Eyni zamanda, işğaldan azad edilmiş torpaqlarımızda quruculuq-bərpa işləri gedir. Azərbaycanın mədəniyyət paytaxtı Şuşa yenidən dirçəlir və beynəlxalq tədbrilərin keçirildiyi məkana çevrilir. Təbii ki, bütün bunlar düşmənlərimizi ciddi şəkildə narahat edir”.
Bunu "Ölkə.Az"a açıqlamasında Milli Məclisin deputatı Aydın Hüseynov deyib.
Onun sözlərinə görə, uğurlarımız Ermənistan, xaricdəki erməni lobbisi və antiAzərbaycan dairələrinin yuxusunu ərşə çəkib: “Amma bu uğurlar təkcə onları deyil, daxilimizdəki “beşinci kolon”u da narazı salıb. Son vaxtlar bu düşərgədən gələn “səslər”, ölkəmizin milli maraqlarına yönəlik fikirlər artıq yerini aksiyaya verib. Belə ki, mayın 14-də Bakının Fəvvarələr meydanında həmin qüvvələrin çağırığı ilə aksiya keçirilib. Əslində buna aksiya da demək olmaz. Bu, kiçik, özü də belə deyərdim ki, başıpozuq bir qrupun səs-küy salmaq, sabitliyin pozulmasına yönəlik hansısa addım atmaq cəhdidir. Əslində bu “aksiya”, orada qaldırılan şüarlar “beşinci kolon”da təmsil olunanların hansı mənəviyyatın və tərbiyənin sahibi olduğunu da bir daha bütün dünyaya nümiayş etdirdi.
Deputat indiki məqamda “beşinci kolon” tərəfindən bu addımın atılma səbəbinə də toxunub: “Görünür “beşinci kolon” yenə xaricdən, xarici ağalarından sifariş alıb. Azərbaycanın uğurlarına qarşı olan xaricdəki bəlli mərkəzlər “beşinci kolon”a “hərəkət et” komandası verib. Amma nə xaricdəki dairələr, nə də onların daxilimizdəki buyruq qulları öz qaranlıq məqsədlərinə çata bilməyəcəklər. Çünki Azərbaycan xalqı pisi yaxşıdan seçməyi bacarır. Çünki ölkəmizdə xalq-iqtidar birliyi, vətəndaş həmrəyliyi var. 44 günlük Vətən müharibəsində xarici düşmənə qarşı bir yumruq kimi yenilməz olan birliyimiz eyni zamanda daxildə sabitliyi pozma istəyənlərə də yerini göstərib və bundan sonra da göstərəcək”.
Ölkə.Az