Mətn ölçüsü:
  • 100%

Əli Məsimli: “Litva ilə əməkdşalıq Azərbaycanın Avropa bazarına çıxışına etibarlı bir platformadır”

“Azərbaycanla Litva arasındakı münasibətlər çox yaxşı siyasi təməl üzərində, bərabərhüquqluluq və qarşılıqlı faydalılıq prinsipləri əsasında qurulduğundan, Litva Prezidentinin mayın 17-də Azərbaycana rəsmi səfəri müzakirə edilən məsələlərin mahiyyəti baxımından mühüm tarixi əhəmiyyət kəsb edir, həm də əhatə dairəsi baxımından perspektivli xarakter daşıyır. Litva Prezidentinin bu səfəri Litva ilə Azərbaycan arasında mövcud olan Strateji Tərəfdaşlıq üzrə Bəyannamənin ruhunu əks etdirməklə, bir daha əməkdaşlığımızın strateji mahiyyətini təsdiq etdi. Səfər zamanı həm ikitərəfli əməkdaşlıq-iki ölkə arasında iqtisadiyyat və enerji sahəsində əməkdaşlığın genişləndirilməsi, həm Qafqaz regionunda təhlükəsizliklə bağlı vəziyyət, həm də Azərbaycan ilə Avropa İttifaqı (Aİ) arasında əməkdaşlığın aktual məqamları və sair bu kimi məsələlər müzakirə olunub”.

Bunu “Ölkə.Az”a açıqlamasında deputat Əli Məsimli deyib.

Onun sözlərinə görə, müzakirələr informasiya texnologiyaları, təhsil, kənd təsərrüfatı, turizm, enerji, bərpaolunan enerji mənbələri, nəqliyyat və digər sahələri əhatə etdi. 

“Bu baxımdan Azərbaycan-Litva əməkdaşlığında həm dördüncü sənaye inqılabının çağırışlarına uyğun İKT, biotexnologiyalar kimi sahələr,həm də, ərzaq məhsullar kimi ənənəvi sahələr də mühüm əhəmiyyət kəsb edir. Ölkələrimiz arasında nəqliyyat və logistika sahəsində əməkdaşlıq da böyük potensiala malikdir. Yaxşı inkişaf etmiş avtomobil yolu, dəmir yolu, intermodal və dəniz limanları infrastrukturu və xidmətlərinə sahib olan Litva Avropa bazarına sərfəli logistik çıxış imkanı təklif edir. Eyni zamanda Litva Avropa-Qafqaz-Asiya nəqliyyat dəhlizinin potensialını araşdırmaqda da maraqlıdır”, - o qeyd edib.

Deputat əlavə edib ki, Litva Prezidentinin Azərbaycana rəsmi səfəri çərçivəsində biznes forum da keçirilib: “İki ölkənin nümayəndə heyətləri ticarət, investisiya, kənd təsərrüfatı, informasiya texnologiyalarının inkişaf etdirilməsi, nəqliyyat, enerji, təhsil ilə bağlı məsələləri müzakirə etdilər. Azərbaycan-Litva “Beynəlxalq yol nəqliyyatı Sazişi”; “Azərbaycan Respublikasının Kiçik və Orta Biznesin İnkişafı Agentliyi (KOBİA) ilə Litva Respublikasının Ticarət, Sənaye və Sənətkarlıq Palataları Assosiasiyası arasında Əməkdaşlıq Memorandumu”; “Azərbaycan Respublikasının İxracın və İnvestisiyaların Təşviqi Agentliyi - AZPROMO ilə Litva İnnovasiya Agentliyi arasında Əməkdaşlıq Memorandumu” “Azərbaycan Respublikası Sahibkarlar (İşəgötürənlər) Təşkilatları Milli Konfederasiyası ilə Litva Respublikası Sənayeçilər Konfederasiyası arasında Əməkdaşlıq Müqaviləsi” və digər sənədlər imzalanıb. Litva Prezidenti diqqətçəkən bir açıqlama verərək bildirib ki, “Azərbaycanın qlobal iqtisadiyyatda oynadığı rolu daha da artacaq. Ukraynadakı müharibə qlobal ticarəti yenidən nizamlayır. Asiya ilə Avropanın kəsişdiyi məkanda yerləşən Azərbaycan qlobal ticarətdə ən mühüm rollardan birini oynayır və oynayacaqdır. Yaşıl iqtisadiyyat və innovasiyalarla bağlı məqsədlər Azərbaycanın gələcək iqtisadi perspektivlərini və gücünü şərtləndirən əsas meyarlardır”. Litva Prezidenti ölkələrimiz arasında biznes əlaqələrini daha da möhkəmləndirmək üçün Azərbaycanın işgüzar dairələrini bu ilin ikinci yarısında Litvaya səfərə dəvət edib. Bu baxımdan Litva ilə əlaqələrin dərinləşdirilməsi iki ölkə çərçivsindən daha geniş imkan və perspektivlərə malikdir. Belə ki, Azərbaycanla Litva arasındakı ikitərəfli əlaqələrin genişləndirilməsi, həm də bizim Avropa İttifaqı ilə əlaqələrimizin gücləndirilməsinin mühüm tərkib hissəsi olmaqla Azərbaycanın Aİ ilə sıx əlaqələrə dair planlarının gerçəkləşməsinə yaxşı dəstəkdir.Uzun illər Azərbaycanın GUAM-dakı nümayəndə heyətinin üzvü kimi Baltik Assambleyasının tədbirlərində iştirak edən bir adam kimi xüsusi vurğulamaq istəyirəm ki, Litva daxil Baltik ölkələri Azərbaycan və GUAM-la əlaqələrin inkişafında maraqlıdır. Bu iki təşkilat arasında əməkdaşlığın inkişafı Azərbaycanın Baltikyanı ölkələrlə əlaqələrinin daha da genişlənməsinə xidmət edir.Baltik ölkələrinin Avropanın digər ölkələrinin əksəriyyəti ilə əlaqələrinin yüksək səviyyədə olmasından çıxış edərk demək olar ki, Litva daxil Baltik ölkələri ilə əlaqələrimizin genişləndirilməsi və dərinləşdirilməsi bu yöndə, xüsusi ilə də Benilüks ölkələri (Belçikanı, Niderlandı, Lüksemburqu), Şimal ölkələri (İsveç, Norveç, Finlandiya, Danimarka,İslandiya), eləcə də Vişeqrad qrupu ölkələrinin (Macarıstan, Polşa, Çexiya, Slovakiya) ilə olan əlaqələrimizin perspektivlərinə əlava impuls veilməsi üçün çox etibarlı bir platformadır. Ona görə də Litva prezidentinin bu səfəri və səfər zamanı əldə edilən razılaşmaların və imzalanan sənədlərin sistemli və davamlı olaraq reallaşdırılmasına səylərin artırılmasını, həm dövlət və hökümətlərarası əlaqələrin, həm iş adamlarının, həm alim və mütəxəssislərin və ictimaiyyətin əlaqələrinin genişləndirilməsini və müasir tələblərə uyğun yeni məzmun verilməsini vacib hesab edirik”.

Mürtəza
Ölkə.Az