Deputat: “Qazanan Ermənistan yox, ondan istifadə edənlər ola bilər”

“Ermənistan  tərəfi Azərbaycanla sülh sazişi imzalanması  istiqamətində danıqşılar prosesinə razı olduğunu bəyan etsə də, bu istiqamətdə konkret addım atmır. Biz son vaxtlar bunun əksinin şahidi olmaqdayıq. Belə ki, Ermənistan tərəfi hər vasitə ilə danışıqlar prosesindən yayınmağa çalışır və  bacardıqca prosesi uzatmağa çalışır”.

Bunu “Ölkə.Az”a açıqlamasında  deputat İqbal Məmmədov Ermənistanın  sülh danışıqları ilə bağlı sərgilədiyi mövqeyi şərh edərkən deyib.

Onun sözlərinə görə, Azərbaycan və Ermənistan  liderləri aprelin 6-da Brüssel görüşündə  sərhədlərin delimitasiyası ilə bağlı birgə işçi qrupun yaradılaraq, aprelin sonunda ilk iclasının keçirilməsi barədə razılığa gəlsə də, qarşı tərəfin  buna hazır olmaması nəticəsində iclasın keçirilməsi bu günə kimi baş tutmayıb. “Ermənistanın hər zaman olduğu kimi yenə də bölgədə sülhün yaranmasında sərgilədiyi destruktiv mövqedən cənab Prezident İlham Əliyev də öz narahatlığını ifədə edib. Cənab Prezident  məsələ ilə bağlı narahatçılığını ifadə edərək bildirib ki, Azərbaycan tərəfi işçi qrupu vaxtında yaradıb, nümayəndə heyətini  danışıqlara ezam etməyə hazır  olsa da, erməni tərəfinin danışıqlar prosesindən yayındığından iclas baş tutmur. Bununla bağlı cənab Prezident deyib: “Sərhədlə bağlı ilk görüşün keçirilməsini təklif edən Ermənistanın Xarici İşlər Nazirliyi olub. Azərbaycan həmin təklifi qəbul edib və biz nümayəndə heyətini göndərməyə hazır idik. Lakin, sonuncu gün-aprelin 29-da Ermənistan artıq razılaşdırılmış görüşü ləğv etdi. Bu, çox məyusedici məsələdir. Daha məyusedici isə, yenə də Ermənistanın ilkin təklifindən irəli gələrək, 7-11 may tarixlərində sərhəddə yeni görüşün keçirilməsi təklifimizdən də Ermənistanın imtina etməsi oldu. Beləliklə, indiyədək, biz Ermənistandan hər hansı yeni tarixləri gözləyirik ki, işə başlayaq. Çünki bu cür məsuliyyətsiz mövqe, əlbəttə ki, narahatlıq doğurur”.

Ölkə başçısının dediyi kimi Azərbaycan hər zaman öhdəliklərə sadiq olub.  Aprelin sonuna qədər görüşə hazır olduğumuzla bağlı Avropa İttifaqı Şurasının prezidentinin iştirakı ilə söz verilmişdisə verilən sözə əməl edilməli idi. Azərbaycan  tərəfi nöbəti dəfə dünyaya  verdiyi sözə sadiqliyini nümayiş etdirərək  deyilən vaxta hazır oldu. Təəssüflər olsun ki, hər zaman olduğu kimi  yenə də Ermənistan tərəfinin məsuliyyətsiziliyi nəticəsində  görüş baş tutmur. Bu da təbii ki,  son dövrlərdə yaranan etimad mühitini pozur və İrəvan hər vəchlə müəyyən bəhanələrə danışıqlardan yayınır. Bununla da vaxt qazanmağa çalışır”- o qeyd edib.

O əlavə edib ki, İrəvanın danışıqlar prosesində destruktiv mövqe nümayiş etdirərək,  Azərbaycanın təkliflərini qəbul edib, onun əsasında sülh sazişi imzalamaq əvəzinə yenidən ATƏT-in Minsk Qrupunun  fəaliyyətini gündəmə gətirməyə  cəhd edirlər. Hansı ki Azərbaycan Prezidenti  44 günlük müharibədən sonra dəfələrlə bəyan edib ki, Qarabağ məsələsi həll olunduğundan ATƏT-in Minsk qrupunu tarixin arxivinə atılıb. Amma Ermənistanın ATƏT MQ-nin vasitəçiliyini yenidən ortaya atması “ölünün dirildilməsi”nə bənzəyir. Digər tərəfdən isə biz hələ də onların Azərbaycan torpaqlarına  ərazi iddiasından əl çəkmədiyini göstərir və bunu başqa formada  danışıqların gündəliyinə salmağa cəhd etdiyini müşahidə etməkdəyik. Bunun üçün ən müxtəlif variantlara əl atırlar. Bunu istər Ermənistanın mövcud hakimiyyətinin sərgilədiyi mövqe, istərsə də müxalifətin son revanşist hərəkətləri deməyə əsas verir. Amma onu da yaxşı anlayırlar ki, bu gün Ermənistanın  danışıqlar prosesini öz istədikləri səmtə yönəltmək üçün heç bir iqtisadi, hərbi və digər resurslara malik deyil. Digər tərəfdən isə dünyada baş verən hadisələr onların xeyrinə deyil.  Vaxt uzatmaqla  prosesi hansısa məcraya yönəltmək heç bir effekt verməyəcək. Əksinə  Ermənistan əlinə düşən fürsətdən faydalanmaq əvəzinə onu da itirmiş olacaq.  Necə deyərlər, 30 ildə olduğu kimi növbəti mərhələdə də itirən tərəf yenə Ermənistan olacaq. Bundan qazanan nə erməni xalqı, nə Ermənistan dövlətçiliyi olacaq, qazanan  ancaq Ermənistandan bölgədə maraqlarını təmin üçün əlində vasitə edən ölkələr  və güclər ola bilər.

Azərbaycan Prezidenti də bəyan edib ki, Ermənistanın revanşist hərəkətlərinə heç bir vəchlə imkan verilməyəcək və onun qarşısı alınacaq. Bundan əlavə olaraq Azərbaycan da tarixi ədaləti bərpa etmək üçün Zəngəzur məsələsini gündəmə gətirə bilər.  Proseslər uzanarsa bu istisna deyil. Azərbaycan Laşın dəhlizini bağlayıb, Qarabağda anti-terror əməliyyatını həyata keçirib. Silahlı separatçılaır təmizləyə bilər.  Lakin  Azərbaycan hələ səbr nümayiş etdirib, məsələni danışıqlar yolu ilə həllinə üstünlük verir. Amma unutmasınlar ki, dəmir yumurq yerindədir. Bax, o zaman Ermənistan daha ağır şərtlərlə qarşılaşa bilər. Odur ki, nə qədər gec deyil İrəvan yaranmış durumu dəyərləndirib həm erməni xalqının, həm də Ermənistan dövlətçiiylinin gələcəyi naminə düzgün qərarlar verməlidir. Onlar bilməlidirlər ki, onlaırn gələcək taleyi Azərbaycan və Türkiyə ilə normal münasibətlər qurmaqdan keçir. Nə qədər ki, Ermənistanın bu iki ölkə ilə normal münasibəti qurub, ərazi iddialarından əl çəkməyib, kimsə onları üzləşdiyi vəziyyətdən  çətin durumdan xilas edə bilməyəcək. Ermənistan Azərbaycanın ərazi bütövlüyünü tanıyıb, sülh sazişi imzlanmayanadək sərhədlər açılmayacaq. İndiyədək özünü təcrid vəziyyətə salan Ermənistan  bundan sonra da  təcrid vəziyyətdə qalaraq regional əməkdşalıqdan  kənarda qalacaq”.

Mürtəza
Ölkə.Az