Vahid Əhmədov: “Rus sülhməramlılarını türk sülhməramlıları əvəz etməlidir”
“Moskva hələ də Qarabağ kartından öz məqsədləri üçün istifadə etməyə çalışır. Məhz ona görə də son dövrlərdə istər rus mediasında Ermənistan-Azərbaycan münaqişəsi ilə bağlı təxribat xarakterli məsələlər gündəmə gətirilir. Amma bu cəhdlərin xeyri yoxdur. Azərbaycanı mövqeyindən döndərmək mümkün deyil. Rus sülhməramlıları Qarabağdan çıxmalıdır və çıxacaq da… Biz bunun şahidi olacağıq”.
Bunu “Ölkə.Az”a açıqlamasında deputat Vahid Əhmədov rus mediasında Qarabağın yenə də müstəqil dövlət kimi təqdim etməsinə münasibət bildirərkən deyib.
Millət vəkili onu da deyib ki, Türkiyə Prezidenti Rəcəb Tayyib Ərdoğan da Qarabağdan rus sülhməramlılarının çıxarılmasına yardım etməyə hazır olduğunu bəyan edib: “Artıq belə bir fikir var və ona görə də rus sülhməramlılarının burada mövcudluğu müvəqqəti xarakter daşıyır İnanıram ki, bu məsələlər tez bir zamanda həllini tapacaq və rus sülhməramlıları çıxacaq. Onlar özləri də, ermənilər də bunu yaxşı bilirlər. Ukraynada vəziyyət getdikcə gərginləşir və oradakı proseslər heç də Rusiyanın xeyrinə inkişaf etmir. Ona görə də Rusiya Qarabağ kartından istifadə etməyə çalışır ki, bəlkə bu bölgədə nəyəsə nail olsun. Ancaq bu mümkün olan şey deyil”.
Deputat əlavə edib ki, artıq Zəngəzur dəhlizinin reallaşması, sərhədlərin demarkasiya və delimitasiyası istiqamətində işlərə başlanıb: “Ona görə Rusiyanın bu cəhdləri havaya boş güllə atmaqdan başqa bir şey deyil. Bu məsələlərdə Azərbaycan dövlət başçısının mövqeyi qətidir. Türkiyənin mövqeyi qətidir”.
Deputat hesab edir ki, Moskvanın bu təxribatxarakterli hərəkətlərinin arxasında Qərbin bölgədə sülh və sabitliyin təmin olunması istiqamətində proseslərə ciddi surətdə dəstək verməsi dayanır: “Qərbin mövqeyi birmənalı şəkildə Azərbaycanın mövqeyi ilə üst-üstə düşür. Qərbin bu addımı Rusiyanı qıcıqlandırır və bundan narahat olduqlarından bu cür təxribat xarakterli hərəkətləri yol verir. Qərb Cənubi Qafqazda sülh və sabitliyin yaranması üçün faktiki olaraq Ermənistana deyir ki, Azərbaycanın 5 təklifi ilə razılaş və bunun əsasında sülh sazişini imzala. İndi erməni lobbisi, Rusiya və digərləri vəziyyəti dəyişmək üçün cəhdlər edirlər. Amma bu cəhdlər uğursuz olacaq. Qərbin bu məsələdə çox qəti mövqeyi var”.
Ermənistanda keçirilən aksiyalara gəldikdə isə deputat bildirib ki, bu aksiyalarda Paşinyanın əli olması istisna deyil.
“Bəlkə Paşinyan da bu aksiyaların keçirilməsində maraqlıdır. Ermənistanda digər qüvvələr də bilir ki, hazırda Paşinyanı devirmək hələ də qeyri-mümkündür. Sadəcə, Paşinyan bu aksiyalardan istifadə edərək sülh sazişi imzalamaqdan boyun qaçırıb, vaxt qazanmaq istəyir. Bu aksiyalarla göstərmək istəyir ki, ölkədə bu məsələyə ciddi etirazlar var. Cəmiyyət narazıdır və müqavimət var. Paşinyan da bundan istifadə edib, sülh danışıqları prosesindən boyun qaçırmağa çalışır. Lakin bunun heç bir faydası olmayacaq. Bir daha qeyd edirəm ki, məsələ ilə bağlı Azərbaycan dövlətinin ortada qəti mövqeyi var. Azərbaycan dövlət başçısı da dövlət maraqlarına uyğun siyasət yürüdür və ona görə də qələbə qaçılmazdır. Odur ki, rus sülhməramlıları da Qarabağdan çıxacaq və başqa yol yoxdur. Rus sülhməramlılarını bölgədə Türkiyə sülhməramlıları əvəz edə bilər. Artıq Ərdoğan da bunun anonsunu verib. Hesab edirəm ki, Türkiyə sülhməramlıları bölgədə daha etibarlı şəkildə sülhü və sabitliyi bərpa edə bilər. Bundan təkcə Ermənistan yox, bütövlükdə regiona ölkələri və digərləri qazanar”, - millət vəkili bildirib.
Mürtəza
Ölkə.Az
