Mətn ölçüsü:
  • 100%

Fransa-Rusiya ittifaqı yaranır: Azərbaycan, Türkiyə və Böyük Britaniyaya savaş açılır

Rəsmi Paris Azərbaycanın enerji sektorunu hədəfə almaqla, rəsmi Bakıdan regional geoiqtisadi, geostrateji və geopolitrik layihələrdə Fransaya da pay qoparmağa çalışır… Azərbaycanın enerji resurslarına ciddi ehtiyac duyan Avropa ölkələrinin Fransanın məkrli intriqalarına və cılız hədəflərinə əhəmiyyət verəcəkləri hazırda qətiyyən inandırıcı görünmür…
Fransanın Azərbaycan dövlətinə qarşı başlatdığı beynəlxalq kampaniya artıq bütün “qırmızı cizgiləri” keçməyə başlayıb. Rəsmi Parisin son davranışları Fransanın Azərbaycana qarşı düşmənçilik siyasəti yürütdüyünü növbəti dəfə təsdiqləyir. Vaxtilə gizli xarakter daşıyan düşmənçilik indi artıq açıq müstəviyə keçirilib. Və bu, Azərbaycan-Fransa münasibətlərinə yenidən baxmaq üçün ciddi əsaslar yaradır.

Məsələ ondadır ki, rəsmi Paris son vaxtlar Azərbaycanın enerji sektorunu hədəfə almağa çalışır. Belə ki, Fransa Avropa Birliyi ölkələrini Azərbaycndan enerji resurslarının idxalına embarqolar tətbiq edilməsinə çağırmağa başlayıb. Rəsmi Parisin Azərbaycana qarşı irəli sürdüyü qondarma “ittihamlar” isə Ermənistanın sərsəm “qara piar” tezisləri ilə eynilik təşkil edir.

Halbuki dünyanın ən ikiüzlü dövləti olan Fransanın əslində, ümumiyyətlə, heç bir ölkəni və ya xalqı ittiham etməyə mənəvi və hüquqi haqqı çatmır. Çünki, Fransanın yaxın tarixi bu dövlətin müstəmləkəçilik siyasəti yürütdüyü ölkələrin xalqlarına qarşı kütləvi qırğınlar və soyqırımlar törətməsi barədə faktlarla zəngindir. Və ona görə də, İtaliya baş nazirinin bir müddət öncə etdiyi kimi, bu ölkənin beynəlxalq səviyyədə ifşa olunması vacibdir.

Digər tərəfdən, son vaxtlar Fransanın Azərbaycan-Ermənistan və Ukrayna-Rusiya münaqişələri arasında aparmağa çalışdığı paralellər də həm qondarma, həm də absurddur. Çünki, bu iki münaqişədə məhz Azərbaycan və Ukrayna hərbi təcavüzə məruz qalmış ölkələrdir. Ukrayna öz ərazilərini Rusiya işğalından qorumağa çalışır. Azərbaycan isə məhz ATƏT-in Minsk Qrupuna həmsədrlik etmiş Fransa, ABŞ və Rusiyanın günahı, ikilistandartlar əsasında davranmaları ucbatından 30 il Ermənistanın işğalı altında qalmış ərazilərini azad etməklə məşğuldur.

Eyni zamanda, Fransanın "hərbi təcavüz olunması" barədə uydurma iddialar icad etməyə çalışdığı Qarabağ bölgəsi də məhz Azərbaycanın beynəlxalq hüquqla tanınmış sərhədləri daxilində olan ərazidir. Yəni Qarabağ iqtisadi regionu Azərbaycanın ayrılmaz tərkib hissəsidir. Və rəsmi Parisin bu mövzuda absurd iddialar irəli sürməsi Azərbaycanın daxili işlərinə qarışmaqdan başqa bir şey deyil.

Fransa məhz belə ermənipərəst mövqe tutduğu üçün rəsmi Bakı tərəfindən Azərbaycan və Ermənistan arasında sülh danışıqlarında, ümumiyyətlə isə Cənubi Qafqazda gedən geopolitik proseslərdə iştirak imkanlarından məhrum edilib. Yəni, rəsmi Paris öz günahı ucbatından Fransanı Cənubi Qafqazda cərəyan edən bütün proseslərdə oyundankənar vəziyyətə salıb. İndi rəsmi Paris Fransanı yenidən Cənubi Qafqazla bağlı proseslərə qaytarmaq üçün Azərbaycana müxtəlif yollarla təzyiq göstərməyə çalışır. Və Fransanın bu cəhdlərinin baş tuta biləcəyi qətiyyən inandırıcı görünmür.

Məsələ ondadır ki, rəsmi Parisin Azərbaycana təzyiq göstərmək üçün elə bir ciddi mexanizmləri yoxdur. Bu ölkənin Azərbaycanın enerji resursları ixracına embarqo qoyulmasına yönəlik cəhdləri də reallıqdan uzaqdır. Birincisi, prezident Emmanuel Makron da bir müddət öncə öz ermənipərəst açıqlamasında qeyd etmişdi ki, Fransa Azərbaycandan enerji resursları idxal etmir. Yəni, Fransanın Azərbaycanın enerji resursları alıcıları arasında elə bir ciddi payı yoxdur. Əgər, Azərbaycandan enerji resursları almırsa, Fransanın embarqoları da heç bir əhəmiyyət daşımır.

Düzdür, Fransa bu məsələni əsas aparıcı ölkələrindən biri olduğu Avropa Birliyi üzərindən də aktuallaşdırmağa çalışır. Ancaq Avropa ölkələrinin Fransanın məkrli intriqalarına, cılız hədəflərinə əhəmiyyət verəcəkləri hazırda qətiyyən inandırıcı görünmür. Çünki Avropa ölkələri hazırda ciddi enerji böhranına düçar olublar.

İndi Azərbaycan enerji resursları qaynağı kimi, Avropa ölkələri üçün "Fransa-Ermənistan bacılıdığı"ndan daha böyük əhəmiyyət daşıyır. Avropa Birliyi enerji resurslarına kəskin ehtiyac duyduğu bir dövrdə Fransanın absurd çağırışlarına uyub, Azərbaycan ilə ciddi problemlər yaratmağa həvəs göstərməz. Yəni, rəsmi Parisin bütün bu avantürist davranışları real nəticə şanslarından çox-çox uzaqdır.

Onu da qeyd etmək lazımdır ki, Fransanın avantürist manevrlərində Azərbaycanın müttəfiqi olan Türkiyəyə qarşı düşmənçiliklə yanaşı, Böyük Britaniya ilə kəskin rəqabət də mövcuddur. Çünki, məhz Böyük Britaniya Azərbaycanın enerji sektorunda ən böyük paya sahib olan ölkədir. Böyük Britaniyanın BP şirkəti Azərbaycanın enerji sektoruna on milyardlarla dollar sərmayə yatırıb.

Fransanın "Total" şirkətinin sərmayəsi isə təxminən bir milyarda yaxındır. İndi Fransa bir tərəfdən də, rəsmi Bakıya təzyiq göstərməklə, daha çox pay qopara biləcəyinə də ümid bəsləyir. Halbuki rəsmi Parisin son davranışları Fransaya əlavə payın ayrılmasından daha çox “Total” şirkəti ilə əməkdaşlığa yenidən baxılmasına da səbəb ola bilər.

Digər tərəfdən, Cənubi Qafqaz ətrafında cərəyan edən proseslərə münasibətdə Fransanın səhnə arxasında Rusiya ilə anlaşdığı və ortaq hərəkət etdiyi barədə də müəyyən məlumatlar mövcuddur. Belə ki, Fransa və Rusiya təmsilçilərinin bəzi beynəlxalq qurumlarda, xüsusilə də, YUNESKO-da Azərbaycana qarşı ortaq  fəaliyyəti artıq tədricən ifşa olunmaqdadır. Bu baxımdan, hazırda Azərbaycanın beynəlxalq səviyyədə Fransa, Rusiya və Ermənistanın iştirakı ilə "üç bacı" əməliyyatına məruz qaldığını da düşünmək olar.

Ancaq Azərbaycan bütün bu təzyiqlərə tab gətirə biləcək gücə və resurslara sahibdir. "Üç bacılar" isə hazırda iflas dövrünü yaşayırlar. Kasıb və Rusiyanın nökəri olan Ermənistanın vəziyyəti hər kəsə məlumdur. Rusiya Ukraynada düşdüyü "savaş bataqlığı"nda boğulmaqda davam edir. Fransa isə böyük sürətlə dünyada nüfuzunu itirməyə başlayıb.

Hətta yaxın vaxtlarda Fransanın dünya nəhəngindən, sadəcə, regional səviyyəli ölkəyə çevrilmə ehtimalı da mövcuddur. Eyni zamanda, şaxtalı qış öz təsirini daha çox göstərdikcə, Fransada daxili böhran dərinləşdikcə, prezident Emmanuel Makronun istefa vermək məcburiyyətində qala biləcəyi də qətiyyən istisna deyil. Və bütün bunları nəzərə aldıqda, Azərbaycanın Fransanın qurmağa çalışdığı “məkrli oyunlar”dan ciddi narahatlıq keçirməsi üçün elə bir əsas yoxdur. (Yeni Müsavat)