Deputat: Üzv toplaya bilməyən partiya ömrünün payızını yaşayan qüvvə deməkdir 

“Bu qanunun ölkəmizdə siyasi proseslərin inkişafına təkan verəcəyinə və demokratik proseslərin daha da dərinləşməsinə zəmin yaradacağına inanıram. Həm də bu qanun real siyasi partiyaların daha çox görünməsinə imkan yaradır. Sözçülüklə məşğul olanlar isə qoy partiya quruculuğu və yeni üzvlərin cəlbi barədə düşünsünlər. Üzv toplaya bilməyən partiya yarpaqları tökülmüş, ömrünün payızını yaşayan qüvvə deməkdir”.

“Ölkə.Az” xəbər verir ki, bunu deputat Razi Nurullayev parlamentdə “Siyasi partiyalar haqqında” qanun layihəsinin müzakirəsi zamanı deyib.

Onun sözlərinə görə, bəzi təzadlı və sual doğuran məqamlar var. 

“Biz bu qanundan sonra 47 qanun layihəsinə açıq hökumətin təşviqinə dair dəyişiklikləri müzakirə edəcəyik və nəzərdə tutulur ki, elektron informasiya resurslarından əldə edilən məlumatları aidiyyatı dövlət qurumu o dövlət qurumundan alır. Bu qanunun tələbini həm də siyasi partiyaların reyestr məsələsində nəzərə almaq lazımdır və bunun detallarını deputat həmkarlarım dilə gətirib”, - o qeyd edib.

Mürtəza
Ölkə.Az