“Sülhməramlılar xaricdən gələn terrorçuların Qarabağda yerləşdirməsinə şərait yaradır” - Deputat

“Azərbaycanlı jurnalist çox haqlı olaraq rus “sülhməramlısı”na deyir ki, bura mənim ərazimdir və sən kimsən məni öz torpağımda hərəkət etməyi qadağan edəsən. Azərbaycan vətəndaşının öz ərazisində hərəkətini məhdudlaşdırmaq sülhməramlıların mandatına daxil deyil. Onun işi ancaq hərəkətin təhlükəsiziliyini təmin etməkdir”.

Bunu “Ölkə.Az”a açıqlamasında deputat Elman Məmmədov rus sülhməramlılarının azərbaycanlı jurnalistləri Xankəndinə buraxmamasını şərh edərkən deyib.

Onun sözlərinə görə, rus sülhməramlıları bölgəyə gəldiyi gündən 30-dan artıq post quraraq erməni separatçılar, terrorçular, cinayətkarlarla birlikdə hərəkət edib, onların Qarabağda möhkəmlənməsinə şərait yaradaraq müdafiə edir. 

“Necə ola bilər ki, başqa ölkənin vətəndaşı sərbəst şəkildə Azərbaycan ərazisində daxil ola bilir, amma Azərbaycan vətəndaşı yox?! Sülhməramlıların at oynatmasına göz yummaq olmaz”, - o vurğulayıb. 

Deputat əlavə edib ki, həmin ərazilər Azərbaycan ərazisi olduğundan yerlərə ordu, polis və təhlükəsizlik xidmətinin əməkdaşları birgə nəzarət etməlidir: “Çünki sülhməramlılar terrorçular, separatçılarla sıx əməkdaşlıq edərək xaricdən gələn terrorçuların Qarabağda yerləşdirməsinə şərait yaradır. Azərbaycan tərəfi İrandan gələn iki qrup terrorçu dəstəni ifşa edib. Bəlkə 22 qrup gəlib? Bilmək olmaz… Onlar bizim ərazilərdə hansı işlərlə məşğuldur və hansı planlar hazırlayırlar. Bu, ciddi siqnaldır. Onların arxasında kim dayanır? Təbii ki, Rusiya, İran, Fransa və Ermənistan. Bu dördlük bölgədə çox ciddi təhlükəli vəziyyətin yaranması üçün hazırlıq görürlər. Bu, açıq göz qarşısındadır. Silah-sursat daşınır, əraziyə terrorçular yerləşdirilir”.

Deputat onu da qeyd edib ki, Birinci və İkinci Qarabağ müharibəsi dövründə İranın hərbi əməliyyatlarda birgə iştirakı barədə ciddi məlumatlar var: “ASALA və İran terrorçuları sıx əməkdaşlıq edir. Odur ki, ciddi tədbir görməliyik. Sülhməramlılar üzərinə götürdüyü öhdəliyi yerinə yetirmədiyindən onları torpaqlarımızdan çıxarmağımızın vaxtı çoxdan çatıb. Hesab edirəm ki, sülhmərmaların torpaqlarımızda qaldığı hər gün bizim üçün təhlükədir”.

Mürtəza
Ölkə.Az