İran bundan nəticə çıxarmasa, itirən tərəf özü olacaq - AÇIQLAMA
İranın yürtüdüyü xarici siyasət Cənubi Qaqazda birmənalı şəkildə mövcud kövrək sülhün pozulmasına və gərginliyin davam etməsinə xidmət edir.
Bunu “Ölkə.Az”a açıqlamasında deputat Şahin İsmayılov deyib.
Onun sözlərinə görə, Azərbaycan İranla normal mehriban qonşuluq səviyyəsində əməkdaşlıq münasibətlərinin qurulmasına çalışsa da, lakin əks tərəfin destruktiv, qərəzli siyasəti nəticəsində bu mümkün olmayıb.
“Biz zaman-zaman İranın Azərbaycana qarşı təhdid, təxribat xarakterli siyasətinin şahidi olmuşuq. Lakin 44 günlük Vətən müharibəsindən sonra İranın ölkəmizə qarşı təhdid və təxribat xarakterli siyasəti davamlı hal alıb. Ermənistan 44 günlük müharibənin nəticələrini özləri üçün faciə hesab etmir, nəinki İran… İşğalçı Ermənistanın məğlubiyyəti barışmayan İran bunu sanki özünün faciəsi, acısı və məğlubiyyəti hesab edir. Azərbaycanın qələbəsini həzm edə biməyən fars-molla rejimi bütün imkanlardan istifadə edib bölgədə dayanıqlı sülhün, sabitliyin yaranması istiqamətində aparılan siyasətə qarşı çıxıb, gərginliyin davam etməsinə çalışır”, - o qeyd edib.
Deputat əlavə edib ki, fars-molla rejimi bu məqsədlə bir yanadan beynəlxalq hüquq normalarını kobud şəkildə pozaraq Ermənistanı yenidən revanşizmə təhrik edir, digər tərəfdən isə Azərbaycanı açıq təhdid edib, daxili işlərinə müdaxiləyə cəhd edir: “Lakin İran unudur ki, əgər indiyədək heç bir dünya dövlətinin Azərbaycanı təhdid və təzyiq dili ilə yürütdüyü siyasətdən və ya yoldan döndərə bilməyibsə, bundan sonra bu, qeyri-mümkündür. Odur ki, fars-molla rejiminin nə sərhədlərimizdə keçirdiyi hərbi təlimlərlə, nə işğalçı Ermənistana verdiyi dəstəklə, nə də ki, digər təhid metodları nəticə verməyəcək. Çünki cənab Prezident də bəyan etdi ki, biz İrandan qorxmadığımız sübut etmək üçün cavab cənub sərhədində cavab hərbi təlimləri keçirdik. Bu günlərdə isə Azərbaycan-Türkiyə birgə “Qardaş yumruğu” şüarı ilə Bakı, Asrata, İmişli və Cəbrayılda hərbi təlimlər keçirdi. Bu birbaşa Tehran rejiminə açıq mesaj idi ki, bizə qarşı olan təhdidlərdən çəkinmirik və buna cavab vermək gücündəyik. Bu həm də Türkiyə-Azərbaycan qardaşılığının və birliyinin dünyaya növbəti mesajı idi. Mesaj ondan ibarət idi ki, Azərbaycana qarşı təhdid elə Türkiyəyə edilən təhdid kimi qəbul edilir. Azərbaycan da eyni qaydada Türkiyəyə qarşı təhdidi özünə qarşı təhdid hesab edir.
Bir daha qeyd edirəm ki, Azərbaycan İranla beynəlxalq hüququn prinsiplərinə uyğun şəkildə normal qonşuluq şəraitində əməkdaşlıq etmək istəyir. Ancaq bu münasibətləri hər dəfə pozan tərəf İran olur. Yekunda isə bundan itirən tərəf Tehran rejimi olacaq. Ona görə də nə qədər gec deyil fars-molla rejimi düzgün nəticə çıxarmalıdır”.
İranda və orada yaşayan soydaşlaırmızın hüquqlarının pozulması ilə bağlı məsələlərə toxunan deputat qeyd edib ki, baş verənlər bir daha fars-molla rejiminin iç üzünü açıb ortaya qoydu: “Bu ölkədə insanlar ən elementar hüquqlarından məhrum edilib. 70 milyondan artıq ölkənin 30 milyonundan artığı azərbaycanlı olsa da, amma öz dillərində təhsil almaqdan məhrumdurlar. Amma bir nçə minlik erməni toplumunun öz dilində təhsil almaq üçün bir neçə məktəbi var. Nəhayətində Azərbaycan Prezidenti Cənubi Azərbaycanda yaşayan soydaşlarımızın hüquqlarını beynəlxalq platformalarda qaldırıb, onların hüquqlarının bərpasını tələb edir. Əminəm ki, yürüdülən bu siyasət öz bəhrəsini verəcək və Cənubi Azərbaycanda yaşayan soydaşlarımızın pozulan hüquqları bərpa olunacaq”.
Mürtəza
Ölkə.Az
