ABŞ Yunuslara verilən cəzaya münasibət bildirdi

ABŞ Dövlət departamenti Arif və Leyla Yunuslara oxunan hökmə reaksiya verib.

Ölkə.az xəbər verir ki, ABŞ-ın məsələyə münasibətini Dövlət departamentinin rəsmisi Con Kirbi media nümayəndələrinə çatdırıb.

"Birləşmiş Ştatlar Azərbaycan məhkəməsinin hüquq müdafiəçiləri Arif və Leyla Yunuslara verdiyi 8,5 və 7 il cəza qərarını narahatlıqla qarşılayır. ABŞ hesab edir ki, adı çəkilən şəxslərə qarşı irəli sürülmüş ittihamlar onların hüquq müdafiə fəaliyyəti ilə bağlıdır və bu fəaliyyət regionda gərginliyin azalması və qarşılıqlı inamın möhkəmlənməsinə yönəlmişdi", deyə Dövlət departamentinin rəsmi nümayəndəsi Con Kirbi bildirib.

O, həmçinin qeyd edib ki, üzərinə götürdüyü beynəlxalq öhdəliklərin yerinə yetirilməsi ilk növbədə Azərbaycanın özünün maraqlarına uyğundur.

Xatırladırıq ki, hüquq müdafiəçiləri Arif və Leyla Yunus cütlüyü bir il əvvəl hüquq-mühafizə orqanları tərəfindən cinayət məcəlləsinin bir neçə maddəsi ilə təqsirli bilinərək məhkəmənin sanksiyasından sonra həbs olunmuşdular.

Leyla Yunus Azərbaycan Respublikasının Cinayət Məcəlləsinin178.3.2-ci (Dələduzluq (külli miqdarda ziyan vurmaqla törədildikdə)), 192.2.2-ci (Qanunsuz sahibkarlıq (külli miqdarda gəlir əldə etməklə törədildikdə)), 213.2.2-ci ((Vergi ödəməkdən yayınma) külli miqdarda törədildikdə), 320.1-ci (Hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma və ya qanunsuz hazırlama, yaxud bu cür sənədi satma, habelə eyni məqsədlə Azərbaycan Respublikasının saxta dövlət təltifini, ştampı, möhürü, blankı hazırlama və ya satma) və 320.2-ci (Bu Məcəllənin 320.1-ci maddəsində göstərilmiş bilə-bilə saxta sənədlərdən istifadə etmə) maddələri, Arif Yunus isə 178.3.2-ci (dələduzluq) maddəsi ilə ittiham olunur.

Ölkə.az