Avropa İttifaqı Yunusları azad etməyə çağırdı
"Hökm Azərbaycanın əsas azadlıqlar və beynəlxalq öhdəliklərə riayət etməsindəki mənfi ənənəni təsdiq edir"
Ölkə.Az xəbər verir ki, Avropa İttifaqı hüquq müdafiəçisi Leyla Yunus və onun həyat yoldaşı Arif Yunusu azad etməyə və onlara qarşı işlərə ədalətli məhkəmə prosesi çərçivəsində baxmağa çağırıb.
Bu barədə Avropa İttifaqının xarici işlər və təhlükəsizlik siyasəti üzrə ali nümayəndəsi Federika Mogerininin bəyanatında deyilib.
"Biz Azərbaycanı Leyla və Arif Yunusu azad etməyə çağırırıq, onların işlərinə şəffaf və ədalətli prosesdə yenidən baxılmalıdır", - deyə Mogerini bəyan edib.
O qeyd edib ki, beynəlxalq müşahidəçilər proses zamanı məhkəmə prosedurlarında pozuntuların olduğunu bəyan ediblər.
"Deyəsən, ittihamlar yalnız onların hüquq müdafiəçiliyi ilə əlaqədardır. Hökm Azərbaycanın əsas azadlıqlar və beynəlxalq öhdəliklərə riayət etməsindəki mənfi ənənəni təsdiq edir", - deyə kommünikdə qeyd olunub.
ABŞ Dövlət Departamentinin sözçüsü Con Kirbi Birləşmiş Ştatların Leyla və Arif Yunus haqqında çıxarılmış həbs qərarından dərin narahatlıq keçirdiyini bildirib. O, Yunusların həbsinin onların insan hüquqları və regionda sülh quruculuğu sahəsindəki fəaliyyəti ilə əlaqəli olduğunu deyib.
Buna cavab olaraq Azərbaycan Xarici İşlər Nazirliyinin Mətbuat xidmətinin rəhbəri Hikmət Hacıyev Azərbaycanda heç kimin peşəkar fəaliyyətinə və siyasi baxışlarına görə təqib olunmadığını diqqətə çatdırıb.
Hacıyev ABŞ Dövlət Departamentini "çıxarılmış ittiham hökmünə və məhkəmə hakimiyyətinin müstəqilliyinə hörmətlə yanaşmağa" çağırıb.
Xatırladaq ki, Sülh və Demokratiya İnstitutunun direktoru Leyla Yunus əmlakları müsadirə olunmaqla 8 il 6 ay və onun həyat yoldaşı, politoloq Arif Yunus isə 7 il müddətinə azadlıqdan məhrum edilib.
Leyla və Arif Yunus 2014-cü ilin iyul ayında həbs olunub. Onlar dələduzluq, qanunsuz sahibkarlıq, vergidən yayınma və sənədlərin saxtalaşdırılmasında ittiham olunub. Onlara qarşı dövlətə xəyanət ittihamı isə ayrıca icraata götürülüb.
Rəşid Mustafazadə
Ölkə.Az
