Xankəndi-Gorus alternativ yolu aprelin 1-dən açılacaq - Arutyunyan

Ermənistanı Xankəndi ilə birləşdirən alternativ yolun torpaq hissəsi təxminən 20-25 gün əvvəl tamamlanıb. 

“Ölkə.Az” xəbər verir ki, bunu Ermənistanın Ərazi İdarəetmə və İnfrastruktur Nazirliyinin mətbuat katibi Sona Arutyunyan “News.am”a açıqlamasında deyib. 

“Bundan sonra birinci asfalt örtüyü salınıb. Hələ də elə yerlərimiz var ki, orada artıq ikinci qatın asfaltlanması prosesinə başlanılıb. Yol aprelin 1-dən nəqliyyatın hərəkəti üçün açıq olacaq və yaya qədər tam asfaltlanmış yol, üç qat asfalt örtüyü olacaq, yol nişanları ilə təchiz olunacaq”, - deyə Arutyunyan qeyd edib.

Xatırladaq ki, Ermənistanın baş naziri Nikol Paşinyan martın 30-da hökumətin iclasında 2022-ci ilin avqustunda Azərbaycanla əldə edilmiş razılaşma nəticəsində alternativ Laçın dəhlizinin marşrutu müəyyən edildiyini bildirib: “Əldə edilən razılaşmaya əsasən, bu marşrut 2023-cü il aprelin 1-dək fəaliyyət göstərməli idi. Bir gün əvvəl Azərbaycan tərəfinə məlumat verilib ki, razılaşmaya əsasən, Kornidzor körpüsündən sonra yol yalnız Ermənistan ərazisinə keçəcək və bu mövqeləri Ermənistanın sərhəd qoşunları dövlət sərhədinin mühafizəsini öz üzərinə götürəcək”.

Mürtəza
Ölkə.Az