AXC-Müsavatın xəyanətinin qurbanı olan Laçın tezliklə cənnətməkana çevriləcək - AÇIQLAMA

“1992-ci ildə AXC-Müsavat cütlüyünün siyasi hakimiyyət uğrundakı mübarizəsi Azərbaycanın sonrakı faciələrinə, torpaqların işğalına yol açdı. Məhz hakimiyyət hərisliyinin nəticəsi olaraq 1992-ci ilin mayında Azərbaycan üçün çox mühüm strateji əhəmiyyət kəsb edən Laçın rayonu işğal edildi. Nəticədə Ermənistanla Dağlıq Qarabağın coğrafi ərazisi arasında birbaşa bağlantı yarandı”.

Bunu “Ölkə.Az”a açıqlamasında deputat Aydın Hüseynov deyib.

Onun sözlərinə görə, Laçının işğalı ermənilərin Azərbaycanın digər ərazilərinin işğalına, həmçinin Dağlıq Qarabağdakı separatçıların möhkəmlənməsinə və işğalçılıq siyasətini davam etdirib, hərbi cinayətlərini həyata keçirməsinə geniş imkanlar yaratdı.

“Məhz AXC-Müsavat cütlüyünün hakimiyyəti Azərbaycan xalqı ardıcıl kütləvi qırğınlara, strateji əhəmiyyətli rayonların itkilərinə məruz qalması ilə nəticələndi. Laçının ardınca 1993-cü ilin aprelində Kəlbəcər kimi böyük strateji əhəmiyyət malik bir rayonun işğal olunması ilə Dağlıq Qarabağla Ermənistan arasındakı Azərbaycan torpaqları işğal altına düşmüş oldu. Laçın və Kəlbəcərin işğalı həm Ağdamın, eyni zamanda ölkədə yaranan dövlətçilik böhranı yenicə müstəqilliynin əldə etmiş Azərbaycan dövlətçiliyinin fiziki cəhətdən yox olma təhlükəsi ilə üzləşdi. Əgər 1993-cü ildə Ulu öndər Heydər Əliyev hakimiyyətə gəlməsəydi, bəlkə bu gün Azərbaycan adlı bir ölkə coğrafi cəhətdən olmayacaqdı. Məhz Ulu öndərin hakimiyyətə gəlişi ilə Azərbaycan üzləşilən bu bəlalardan xilas olub, müstəqilliyini möhkəmləndirərək, inkişaf yoluna qədəm qoymuş oldu. Hələ zamanında Ulu öndər bəyan edirdi ki, işğal olunmuş torpaqlar işğaldan azad olunacaq, məcburi köçkünlər öz doğma yurdlarına, Şuşaya, Laçına, Kəlbəcərə qayıdacaq. Ulu öndərin Azərbaycanın inkişafı və torpaqlarımızın işğaldan azad olması istiqamətində  bünövrəsini qoyub, başlatdığı uğurlu siyasət onun layiqli siyasi varisi cənab Prezident İlham Əliyev tərəfindən davam etdirildi. Müzəffər Ali Baş Komandan, Prezident İlham Əliyevin rəhbərliyi, siyasi iradəsi, qətiyyəti, uzaqgörənliyi nəticəsində 30 ilə yaxın işğal altında olan torpaqlar, o cümlədən Laçın rayonu da işğaldan azad edildi”, - o qeyd edib.

Deputat əlavə edib ki, 2020-ci ildə 44 günlük müharibənin yekunu olaraq Laçın və Kəlbəcər kimi strateji, ən çətin coğrafi relyefə malik olan ərazilərimiz müzəffər Ali Baş Komandanın yürütdüyü müdrik siyasət nəticəsində bir güllə atılmadan azad edildi: “Cənab Prezidentin uzaqgörən, qətiyyətli siyasəti nəticəsində torpaqlarımız həm döyüş, həm də diplomatik-siyasi yolla işğaldan azad edilərək Azərbaycan bayrağı həmin torpaqlarda yenidən dalğalanmağa başladı. Bu, Azərbaycanın müasir tarixində böyük tarixi zəfəri idi. Çünki tarixdə belə hadisələr çox nadir hallarda olur. Belə qələbələr ancaq müdrik, uzaqgörən liderlik və sərkərdəlik qabliyyətinə malik şəxslərin fəaliyyəti nəticəsində mümkün olur. Məhz cənab İlham Əliyevin liderlik və sərkərdəlik qabliyyəti nəticəsində Azərbaycan belə bir tarixi zəfərə imza atdı. Azərbaycan ordusu müasir dünyanın hərb tarixinə qızıl hərflərlə qələbə səhifəsi yazmış oldu”.

Deputat onu da bildirib ki, Laçın və Kəlbəcərin bir güllə atılmadan azad edilməsi Azərbaycanın növbəti uğurlarına, işğaldan azad edilmiş ərazilərdə sürətli bərpa-quruculuq işlərinin həyata keçirlməsinə, erməni revanşizminin baş qaldırmasının qarşısını almağa imkan verdi: “Çünki ermənilər Laçında geniş məskunlaşma həyata keçirdiyindən çıxmaq istəmirdilər. Onlar Laçının  Qarabağla Ermənistan arasında birləşdirici bir ərazi olaraq qalmasını istəyirdilər. Bu məsələdə Ermənistanı Fransa və digər ölkələr dəstəkləyirdi. Bu da Ermənistanın mövqeyini daha barışmaz edirdi. Laçın rayonunun böyük bir qismi azad edilsə də, Laçın şəhəri Xankəndi ilə Ermənistanı birləşdirən dəhliz üzərində qalırdı. Amma cənab Prezidentin qətiyyətli siyasəti və alternativ yolun ən qısa zaman ərzində tikintisi nəticəsində Laçın şəhəri də azad edildi və Azərbaycan bayrağı  qaldırıldı. 

İşğaldan azad edilən Laçın rayonunda sürətli bərpa-quruculuq işlərinə başlanıldı. Artıq Laçın şəhərinin bərpası istiqamətində sürətli işlər gedir. Rayonun infrastrukturunun qurulması, yeni müasir tipli yaşayış məntəqlərinin salınması istiqamətində genişmiqyaslı işlər həyata keçirilir. Laçının gələcək inkişafı ilə əlaqədar olaraq mürəkkəb coğrafi relyefə malik bir ərazidə yeni hava limanını tikilməkdədir. İlin sonunadək Laçın ilk dönüşün başlanması planlaşdırılır. Prezidentin yürütdüyü siyasət nəticəsində Laçın ən qısa zamanda ölkəmizin işğaldan öncəki illərdəkindən də inkişaf etmiş bölgələrindən birinə çevriləcək. Təkcə Laçın deyil, bütün işğaldan azad edilən bölgələrimiz cənnətməkana çevriləcək.

Düzdür, bir çoxları Azərbaycanın müharibədən sonra ən qısa zamanda öz gücünə belə bir inkişaf mərhələsinə qədəm qoymasını gözləri götürmür. Hər vəchlə bu inkişaf prosesinə mane olmağa, bölgədə gərginliyin davam etməsinə çalışırlar. Bu məqsədlə bölgədə gərginliyin davam etməsi üçün ən müxtəlif təxribatlara əl atıb, ölkəmizə qarşı təhdidlər yaradırlar. Lakin bu maneələr bizə mane ola bilməyəcək. Cənab Prezidentin milli maraqlara söykənən qətiyyətli siyasəti nəticəsində bütün bu maneələr aradan qalxacaq və Azərbaycan qarşısında duran problemləri həll edərək, hədəflərinə nail olacaq”.

Mürtəza
Ölkə.Az