Baş konsul: Azərbaycan Mərkəzi Asiyanın neft və qaz sərvətlərinə açılan qapıdır

Avqustun 26-da ABŞ-ın nüfuzlu “Washington Times” qəzetində Azərbaycanın Los Ancelesdəki baş konsulu Nəsimi Ağayevin məqaləsi dərc olunub.

Ölkə.Az xəbər verir ki, məqalənin əsas məğzi Azərbaycanın Avropa ilə strateji münasibətlərinə sadiq qalmasıdır.

“Qəzetlərdəki məqalələr Qərbə çatdırılan enerji resurslarının tükdən asılı olduğu təəssüratını yaradır. İŞİD-in Suriya və İraqda irəliləməsi, Ərəb körfəzində gərginlik, Liviya və Yəmənin dezinteqrasiyası, Ukraynada konfrontasiya qarşısıalınmaz görünür – bütün bunlar dünyada enerji resurslarının çatdırılmasının təhlükəsizliyinin əvvəllər olduğu kimi sabit olmadığını ehtimal edir.

Buna baxmayaraq, Avrasiyada yalnız Avropa üçün deyil, eləcə də bütün dünya icması üçün enerji resurslarının daha sağlam bazarının yaradılması üçün cəhdlər edilir. Bu bazar, Xəzər enerji resurslarını Avropa ilə birləşdirəcək Cənub Qaz Dəhlizinin də daxil olduğu yeni boru kəmərləri şəbəkəsinin yaradılmasını nəzərdə tutur.

Bundan başqa, Türkiyə sərhəddində Balkandan keçərək İtaliyaya qədər uzanacaq Trans-Adriatik boru kəmərinin inşası üçün razılıq əldə edilmişdir, mart ayında isə Cənubi Qafqazdan başlayaraq, Türkiyədən keçən Trans-Adriatik boru kəməri ilə birləşəcək Trans-Anadolu boru kəmərinin inşasının əsası qoyulmuşdur”, - müəllif yazır.

Müəllif qeyd edir ki, bütün bu layihələrin mərkəzində Cənubi Qafqazda, Rusiya və İran arasında yerləşən Azərbaycan durur:

“Yenilik deyil ki, müstəqilliyini bərpa etdikdən sonra beynəlxalq sərmayə və tərəfdaşlıq üçün öz qapısını açan Azərbaycan 20 ildən çoxdur ki, Qərbin etibarlı enerji tərəfdaşı olaraq qalmaqdadır. 2006-cı ildən ölkə BTC boru kəməri ilə Avropa, ABŞ və İsrailə milyon barelə yaxın neft xammalı çatdırıb. İndi Azərbaycan Şah-Dəniz yatağından keçəcək Cənub Qaz Dəhlizinin inşasında əsas oyunçulardandır”.

Müəllifin sözlərinə görə, Azərbaycan nəhəng qaz ehtiyatlarına (2,6 trilyon kubmetr) malikdir.

“Azərbaycan yalnız öz nəhəng neft və qaz yataqlarına görə deyil, eyni zamanda, Mərkəzi Asiyanın enerji resurslarının Avropaya ötürülməsində xüsusi geostrateji önəmə malikdir. Azərbaycansız bu ehtiyatlar Avropa üçün qapalı olardı”, - konsul yazır.

Müəllif eyni zamanda bir sıra problemlərin mövcud olduğunu qeyd edir.

“Regional və geosiyasi çətinliklərdən başqa, ölkə beynəlxalq icmaların bu torpaqların azad edilməsinə dair bütün çağırışlarına baxmayaraq, Qarabağı qanunsuz olaraq işğal altında saxlayan Ermənistanın işğalçı siyasəti ilə üz-üzə qalıb.

Bununla yanaşı, Azərbaycan Avropa ilə strateji münasibətlərinə sadiqdir. Amma təchizatçının sabit olmadığı halda çatdırmaların sabitliyi məna kəsb etmir.

Azərbaycan hökuməti bunu çoxdan dərk edib, neft və qazdan əldə edilən gəliri ölkənin modernizasiyası və bütün dünya üçün açıq olan müasir cəmiyyətin qurulması üçün istifadə edir. Bu gün Azərbaycanda yoxsulluq səviyyəsi 2000-ci ildə olan 50% ilə müqayisədə 5%-dən ibarətdir.

İşsizlik səviyyəsi də 5%-dən azdır. 1995-ci ildən Azərbaycanın ÜDM-si 20 dəfə yüksəlib və bu gün 8000 dollardan ibarətdir.

Prezident İlham Əliyevin rəhbərliyi altında ölkə sərvətlərini və “qara qızıl”dan əldə edilən gəliri öz cəmiyyətinin inkişafına yatırır, indi isə bu ehtiyatları bütün dünyada humanitar layihələri dəstəkləmək üçün istifadə edir”, - materialda deyilir.

Müəllif Azərbaycanın tarixən malik olduğu və bu gün də böyük qürur hissi ilə yaşatdığı qədim tolerantlıq ənənələrindən bəhs edir və bu ənənələrin neft-qaz resursları qədər ölkəmizin ən qiymətli sərvətlərindən olduğunu qeyd edir:

“Əhalisinin əsas hissəsi müsəlmanların təşkil etdiyi Azərbaycan, sivil ölkə olaraq, müasir multikulturizm və dinlərarası harmoniyanın modeli olaraq qalmaqda davam edir”.

Müəllifin sözlərinə görə, Cənub Qaz Dəhlizi layihəsi irəliləyir, və qazın Avropaya ilk nəqlinə 2019-cu ildə başlanması planlaşdırılır.

“Bu, Avropanın iqtisadi inkişafının, qlobal sabitliyin, eləcə də Azərbaycanın Qərb ilə tərəfdaşlığının genişləndirilməsinin təminatında mühüm addım olacaq”, - Nəsimi Ağayev sözünü yekunlaşdırıb.

Ölkə.Az