Politoloq: "Azərbaycan sıçrayışla Türkiyəyə tərəf gedirdi Qarabağı itirdi, Ukrayna da həmin taleyi yaşayır"

Ukraynada vəziyyət yenidən qarışıb

Ali Radanın demərkəzləşdirmə ilə bağlı uğurlu səsverməsi xəbərindən sonra etirazçılar, polis və Milli Qvardiya əməkdaşları arasında toqquşmalar başlayıb.

Etirazçılar parlamentə hücuma keçib. Hüquq-mühafizə orqanları buna reaksiya verib və etirazçılar şüşə qablar, tüstü bombalarından istifadə ediblər. Qarşıdurma zamanı xəsarət alanların olduğu bildirilir.

Ukraynada vəziyyətin qarışmasına politoloq Zərdüşt Əlizadə Ölkə.Az-da münasibət bildirib.

Zərdüşt Əlizadə: "Ukrayna dövləti bizim bir atalar məsələndəki vəziyyətə düşüb, "yuxarı tüpürür bığ, aşağı tüpürür saqqal". Onları elə bir vəziyyətə qoyublar ki, istənilən çıxarılan qərar Ukrayna dövlətinin, xalqının əleyhinədir. Fərz edək, əgər onlar qərar çıxarsalar ki, regionlara, xüsusilə Donbasa geniş səlahiyyətlər verilsin, bu o deməkdir ki, Rusiyanın Donbası nəzarətdə saxlaya-saxlaya Ukrayna hökümətinin siyasətinə həlledici təsir imkanı yaranacaq. Rusiya ilə qarşıdurmadan bezmiş Qərb bir qədər mövqelərini sərtləşdirəcək. ABŞ deyə bilmərəm, ancaq Avropa bu qarşıdurmadan bezib. Eyni zamanda Donbasda nə hərb, nə də sülh vəziyyəti davam edir. Orada nəyəsə nail olmaq üçün gərək gözləsinlər ki, Rusiya dağılsın.

Düşünülmədən milli radikalların atdıqları səfeh addımlar, ifrat radikalizim ona gətirdi ki, Krımı itirdilər. İndi də, Donbas və Luqansk itirilir. Hər hansısa bir millət nə vaxtsa buraxdığı kobud səhvə görə, lotuluğa görə, müvəffəqiyyətsizliyə görə, tarix qarşısında məsuliyyət daşıyır və müqəddaratı ilə cavab verir. Ukrayna faktiki olaraq parçalanıb. Krım Rusiyanın tərkibinə qatılıb. Donbas isə Ukraynaya itaət etmir. Bütün bunların fonunda Kiyev sıçrayışla Avropaya getmək istəyir. Bir ölkə heç vaxt sıçrayışla bir yerə gedə bilməz. Azərbaycan sıçrayışla Türkiyəyə tərəf gedirdi Qarabağı itirdi, Ukrayna da həmin taleyi yaşayır. Moldova Ruminiyaya birləşmək istəyirdi, Dnesteryani ərəzini itirdi. Gürcüstan NATO-ya girmək istəyirdi, Abxaziya və Cənubi Osetiyanı itirdi. Ağıllı siyasətçilər gerçəkliyi görməlidir. Ukraynadakı son hadisələr göstərir ki, bu böhran hələ uzun müddət davam edəcək".

Səxavət Məmməd
Ölkə.Az