Səfir Paskal Mönye: “Azərbaycan sürətlə inkişaf edən ölkədir”

“Azərbaycanla Fransa arasında münasibətlər çox yaxşıdır. İki ölkə prezidentləri son 3 ildə 6 dəfə görüşüblər”.

Bunu Fransanın Azərbaycandakı səfiri Paskal Mönye deyib. Onun sözlərinə görə, təhsil sahəsində əməkdaşlıq ölkələr arasında əlaqələrin prioritet istiqamətlərindən biridir. Səfir Azərbaycanın sürətlə inkişaf edən bir ölkə olduğunu bildirib: “Fransa təhsil sahəsini informasiya texnologiyaları ilə təmin edən ölkədir. Biz istəyir ki, münasibətlərimizi əməkdaşlıqla birləşdirək”.

Səfir Təhsil Nazirliyi, “Təhsildə İnnovativ Texnologiyalar” Əlavə Təhsil Mərkəzinin və Paris Sorbon Universitetinin Abu Dabi kampusunun birgə əməkdaşlığı ilə Qubada təşkil olunan “Məktəb idarəetməsi” mövzusunda təlim kurslarının əhəmiyyətindən danışıb.
O, azərbaycanlı gənclərin Fransada təhsil almaq imkanlarını qiymətləndirib. Paskal Mönye Fransada təhsilin pulsuz olduğunu və bunun azərbaycanlı tələblərə bu ölkədə təhsil almaq üçün yaxşı şans olduğunu bildirib.

Qeyd edək ki, Quba təşkil olunan kursların əsas məqsədi seçilmiş məktəb direktorları üçün qabaqcıl təlim sistemi və effektiv məktəb idarəetməsi anlayışını tanıtmaq, məktəb rəhbərlərinin liderlik potensialını inkişaf etdirməkdir. Təlim Sorbon Universitetinin xüsusi dəvət olunmuş professoru Florent Pratlong tərəfindən keçiriləcək. Əlavə olaraq, kurs çərçivəsində yerli təlimçilər tərəfindən liderlik, məktəb çərçivəsində şagird sağlamlığının qorunması, vaxtın idarə olunması, təqdimat bacarıqlarının inkişafı və s. mövzularda interaktiv sessiyalar təşkil olunacaq.

İştirakçıların asudə vaxtını səmərəli təşkil etmək üçün yaradıcı ev tapşırıqları veriləcək, intellektual oyunlar və kino axşamları təşkil olunacaq.Apa

Ölkə.Az