Laçınlılardan deputatlarına MESAJ:

İki aydan sonra Azərbaycanda parlament seçkiləridir

Belə bir həssas məqamda 121 saylı Laçın seçki dairəsindən olan bir qrup seçici deputat Nazim Fərəcov barədə narazılıqlarını Ölkə.Az saytı vasitəsilə ifadə ediblər. Seçicilər bildirirlər ki, N.Fərəcov deputat olduğu beş il ərzində nadir hallarda onlarla görüşüb, problemləri ilə maraqlanıb:

"Milli Məclisin çox fəal deputatları var və onların kim olduğunu cəmiyyət də yaxşı bilir. Amma bizim deputatı heç öz seçicilərimiz doğru-dürüst tanımır. Çünki deputat olduğu beş il ərzində bu adamın üzünü beş dəfə görə bilməmişik".

Seçicilər bildirirlər ki, Nazim Fərəcov onların problemlərinə laqeyd olduğu kimi, Milli Məclisin iclaslarında da qeyri-fəaldır və bu, onları qane etmir:

"İndiyə kimi bir dəfə görməmişik ki, deputatımız Milli Məclisdə hansısa məsələni qaldırsın və onun həllinə cəhd göstərsin. Laçın seçiciləri məcburi köçkünlərdir və məlum olduğu kimi bu insanların problemləri digər dairələrdən olan seçicilərlə müqayisədə daha çoxdur. Deməli, Laçının deputatı da digər deputatlardan daha fəal və təşəbbüskar olmalıdır. Amma təəssüf ki, beş ildə bunu görmədik".

Seçicilər qeyd edirlər ki, noyabrın 1-də keçiriləcək parlament seçkilərində Nazim fərəcova səs vermək niyyətində deyillər:

"Çox güman ki, o, yenidən namizədliyini irəli sürəcək. Amma istərdik Nazim Fərəcov da bilsin ki, laçınlılar bu dəfə ona səs verməyəcək.

Əldə etdiyimiz məlumata görə, Nazim Fərəcovun böyük qardaşı, Abşeron rayonunun icra başçısı Zakir Fərəcov qardaşının yenidən deputat seçilməsi üçün "səxavət kisəsinin" ağzını açmaq niyyətindəymiş. Görünür, laçınlıların N.Fərəcovdan narazı olması böyük qardaşı da fikrindən daşındıracaq.

Ölkə.Az