Erməni mediası: Aİ Zəngəzur dəhlizinin açılmasına töhfə verir

2023-cü ilin əvvəlində Aİ "Resilient Syunik - Team Europe" proqramının başlandığını elan etdi. Bu, Aİ-yə üzv dövlətlərin və Avropa İnvestisiya Bankının Ermənistanın Sünik bölgəsinin inkişafını təşviq etmək məqsədi daşıyan təşəbbüsdür. Proqramın 5 illik büdcəsi əvvəlcə 51 milyon avro idi, sonra isə iki dəfə artırılaraq 116 milyon avroya çatdı.

Ermənistanın “Past” qəzeti yazır ki, proqram əslində daha dərin məzmuna malikdir və Qərb bu regionun və Ermənistanın inkişafında qətiyyən maraqlı deyil. Nəşr Rusiya mətbuatına istinadən xəbər verir ki, bu təşəbbüs Zəngəzur dəhlizinin açılması üçün müvafiq infrastrukturun hazırlanmasına yönəlib.

Zəngəzur dəhlizi uzunluğu təxminən 40 km olan nəqliyyat dəhlizinin layihəsidir. Bu marşrutun Azərbaycanın qərb rayonları ilə Azərbaycanın Naxçıvan Muxtar Respublikası arasında nəqliyyat əlaqələrinin yaradılması məqsədilə həyata keçirilməsi planlaşdırılır. Beləliklə, Türkiyədən Azərbaycana birbaşa quru marşrutu formalaşır və oradan artıq Xəzər dənizi vasitəsilə Orta Asiya və Çinə çıxış yaranır.