Komitə sədri: “Bu, Azərbaycanın yeni dünya düzənində ciddi aktora çevrilməsinə imkanlar yaradacaq”

Azərbaycan yürütdüyü uğurlu enerji siyasəti nəticəsində nəinki  Avrasiyanın enerji xəritəsini dəyişib, eyni zamanda Avropada böyük təsir gücünə malik bir ölkəyə çevrilib.

Bunu “Ölkə.Az”a açıqlamasında Milli Məclisin təbii ehtiyatlar, energetika və ekologiya komitəsinin sədri Sadiq Qurbanov  “Bakı Enerji Həftəsi”nin əhəmiyyətini şərh edərkən deyib.

Onun sözlərinə görə,  enerji təhlükəsizliyi artıq ölkələrin  milli təhlükəsizlik məsələsi olduğundan Azərbaycan bu sahədə, xüsusən də Avropanın enerji təhlükəsizliyinin təmin olunmasında  xüsusi rol oynayır. “Son 30 ildə bu  istiqamətdə  görülən məqsədyönlü fəaliyyət nəticəsində  Azərbaycan artıq Avrasiyanın önəmli enerji logistika mərkəzlərindən birinə çevrilib.

Son iki ildə isə Azərbaycan artıq Avropa ölkələrini qaz  təchizatında  xüsusi rol oynamaqdadır.  Artıq Azərbaycanı  Cənub-Şərqi Avropa və Cənub-Qərbi Avropa ölkələrini qazla təchiz edilməsi istiqamətində ciddi işlər görüb və görməkdədir. Bu istiqamətdə qarşıda ciddi  hədəflər və planlar  mövcuddur.  Azərbaycanın bu istiqamətdəki səyləri  Avropa ölkələri tərəfindən çox yüksək qiymətləndirilir”, - o qeyd edib.

Komitə sədri əlavə edib ki, bu fəaliyyətin nəticəsi olaraq Azərbaycan Avropada  böyük nüfuza, təsir gücünə malik olmaqla yanaşı, etibarlı tərəfdaş kimi qəbul edilir: “Bu da Azərbaycan beynəlxalq aləmdəki nüfuzunun daha da güclənməsinə, ciddi söz sahibinə və əvəzedilməz aktora  çevrilməsinə imkan yaradır. Odur ki, Avropa ölkələri öz enerji təhlükəsizliklərinin təmin olunması istiqamətində Azərbaycanla əməkdaşlığa çox böyük önəm verirlər. Bu gün Azərbaycan Avropa bazarına təkcə neft və qaz çıxarmır, eyni zamanda    bərpaolunan “yaşıl enerji” ixrac etmək istiqamətində ciddi addımlar atmaqdadır.  “Yaşıl enerji” ixracının təmin edilməsi isə Avropanın enerji təhlükəsizliyinin daha etibarlı şəkidlə təmin edilməsinə imkan  verəcək. “Yaşıl enerji” sahəsində Azərbaycan, Gürcüstan, Macarıstan, Rumıniya  arasında imzalanan  sənəd  bu sahənin də inkişaıfna öz böyük töhfəsini vermis olacaq. Bu, həm də Azərbaycan  enerji sektorunun şaxələndiirlməsi ilə bərabər, iqtisadiyyatının inkişafına da  əlavə imkanlar qazandıracaq. Çünki bu sahə yeni olduğundan yeni-yeni şirkətlər bərpaolunun enerji sahəsinin inkişafı baxımdan Azərbaycana böyük həcmdə sərmayələr yatıracaq. Bu həm yeni iş yerlərinin açılmasına, rifah halının yaxşılaşmasına, həm də Azərbaycanın qarşısında duran hədəflərə nail olmasına imkan verəcək.
 Azərbaycanın Avropanın enerji təchizatçısına çevrilməsi nəticə etibarı ilə  İkinci Qarabağ müharibəsindən sonra ölkəmizin Cənubi Qafqazda yaratdığı yeni reallıqların həyata keçməsinə,  güclü bir dövlətə, həmçinin yeni dünya düzənində ciddi bir oyunçuya çevrilməsinə, İrəvanla sülh sazişinin  imzalanmasına  və bölgədə sülhün, sabitliyin, əməkdaşlıq formatının yaranmasına gətirib çıxaracaq. 

Əminəm ki, Azərbaycan Prezidenti cənab İlham əliyevin bu sahədə yürütdüyü uğurlu və çevik siyasət nəticəsində Azərbaycan logistik  qovşaq ölkəyə çevriləcək. Türk dünyasını birləşdirən Zəngəzur layihəsi də öz müsbət həllini tapacaq ”. 

Mürtəza
Ölkə.Az