Seçicisini ölümlə hədələyən, anasını söyən deputat kimdir?

Ölkə.Az Milli Məclisin üzvlərinin beş ildə gördüyü və görmədiyi işlər barədə silsilə yazılarını davam etdirir

Bu dəfə 78 saylı Lerik seçki dairəsinin deputatı İqbal Məmmədovun geridə qalan beş ildə fəaliyyətini əldə etdiyimiz məlumatlar və seçici fikirləri ilə təhlil edəcəyik.

İqbal Məmmədov parlamentin "lal" deputatlarından hesab olunur. Aqrar siyasət komitəsinin üzvü olan Məmmədov ötən beş ildə Milli Məclisdə müzakirə olunan məsələlərə nadir hallarda münasibət bildirib.

Halbuki deputatı olduğu Lerik rayonunda əhalinin böyük hissəsi məhz kənd təsərrüfatı ilə məşğul olur. Deməli, aqrar siyasət komitəsinin üzvü kimi Məmmədov daha çox təşəbbüslər irəli sürməli, kənd təsərrüfatının inkişafı üçün təkliflərlə çıxış etməliydi.

İqbal Məmmədov icra başçısı Rövşən Bağırovla yaxın münasibəti ilə seçilir. Hətta bu iki şəxsin adı dəfələrlə torpaq qalmaqalında da hallanıb. Xatırlayırsınızsa, bu ilin fevralında Lerikin Nəriman Nərimanov küçəsi ev 21 ünvanının sakini Eldəniz Şadkamal oğlu Quliyev "Yeni Müsavat" qəzetinə müraciət edərək 60 sot torpaq sahəsinin Rövşən Bağırov və İqbal Məmmədov tərəfindən qeyri-qanuni şəkildə ələ keçirildiyini söyləmişdi.

İqbal Məmmədovla bağlı başqa bir maraqlı məqam onun seçiciləri ölümlə hədələmək "bacarığıdır". Elə məhz E.Quliyevə məsələni ictimailəşdirəcəyi təqdirdə “səni aradan götürərəm” deyən deputat seçicinin 75 yaşlı anasını da təhqir etməkdən çəkinməmişdi.

Deputatın qardaşı Çingiz Məmmədov da rayonda qoluzorluluğu ilə adından söz etdirir. Hətta bir müddət öncə rayonun Piran kənd sakini Elsevər İbrahimov məhz Çingiz Məmmədovun qəzəbinə tuş gələrək döyülmüşdü. Ç.Məmmədovun beton zavodunda sürücü işləyən E.İbrahimovun duruşundan xoşu gəlməyibmiş:

"Saat 11 radələrində məni göndərdilər ”Relaks”a, yük göndərməyə. Saat 3-ə işləmiş qayıdıb gəldim, nahar da etməmişdim. Bir də gördüm ki, zavodun müdiri Çingiz məni yanına çağırır. Mən də gəldim . Gördüm bir nəfərlə söhbət edir, gəldim, qaldım onun yanında. Birdən mənə tərəf dönüb “Küçük, bu nə təhər duruşdu, qalmısan yanımda” deyərək, qəfildən bir sillə vurdu, sonra da boğazımdan tutub yıxdı yerə. Sonra ətrafdakılar bizi zorla ayırdı, mən də çıxıb getdim evə".

Ən qəribəsi odur ki, İqbal Məmmədovun tərcümeyi-halında onun ziyalı ailəsində dünyaya gəldiyi göstərilib.

Seçicilər İqbal Məmmədov barədə nə düşünür?

78 saylı dairənin seçiciləri hesab edirlər ki, İqbal Məmmədov bu dəfə də deputatlığa namizəd olsa, bu onlar üçün ikiqat təhlükəlidir:

"Bu adam varlandıqca camaatı ayağının altına alır. Özünün elədikləri azmış kimi qardaşı da istədiyi vaxt sürücüsünü döyür, təhqir edir və heç kim bu adamlara "gözün üstə qaşın var" demir. Amma o unutmasın ki, yenə adamlarını göndərib qapı-qapı səs istəyəcək. Bizə hüquqlarımızı müdafiə edən, sözümüzü deyən, sözün əsl mənasında vəkilimiz olan şəxs lazımdır, anamızı söyən yox, bizi döydürən deputat yox".

Ölkə.Az