Türkiyədə terror niyə artıb?

PKK terrorçularının törətdiyi əməl nəticəsində 15 türk əsgəri şəhid olub

Hadisədən dərhal sonra türk ordusu əməliyyatlara başlayıb.

Türkiyə prezidenti Ərdoğan bir müddət öncə bir açıqlamasında "Əgər 400 millət vəkilinin təmsil olunduğu və konstitusiyanı dəyişdirə bilən tək bir partiya hökumət qura bilsə idi, bu terror hadisələri olmazdı" bildirmişdi. Ərdoğanın bu fikri bir çox politoloqlar tərəfindən birmənalı qarşılanmayıb və hadisələrdə xalqın günahkar çıxarılması və şəhidlərin üzərindən siyasi xal qazanmaq istəyi kimi dəyərləndirilib.

Türkiyədə baş verən qanlı hadisələrlə və Ərdoğanın yuxarıdakı sözləri ilə bağlı D18 hərəkatının sədri Ruslan İzzətli və politoloq Qabil Hüseynli Ölkə.Az-a açıqlama veriblər.

Ruslan İzzətli: "Ərdoğanın 7 iyun seçkilərindən əvvəl əsas məqsədi bu idi ki, AKP-dən parlamentə 400-dən çox millət vəkili seçilsin və hökuməti formalaşdırsın. Ərdoğan prezident olduğu üçün seçkilərə birbaşa müdaxilə edə bilməsə də hər kəsə bəlli idi ki, bir partiyadan 400 millət vəkilinin seçilib, tək partiyalı iqtidar qurulsun deyəndə, o, keçmiş partiyasını nəzərdə tuturdu. Ərdoğan və digər AKP təmsilçiləri çıxışlarında bir çox vaxt bu məsələni qabardırlar. Onlar türk lirəsinin dollara nisbətən kəskin ucuzlaşmasını, infiliyasiyanın artmasını və digər problemlərdə günahkarı koalisiya hökuməti qurulmasına razı olmayan partiyalarda göstərməyə çalışırlar.

Ərdoğanın PKK terrorunun və digər problemlərin artmasında səbəb kimi seçkinin nəticəsini vurğulaması 1 noyabr seçkiləri üçün əslində təbliğatdır. AKP-nin uğurlarından biri o idi ki, onların iqtidar dönəmində son iki ildə PKK ilə döyüşlər dayandırılmışdı. "Kürd açılımı" məsələsi bir çox insanlar tərəfindən müsbət qarşılanırdı. Hər kəs türk-kürd qardaşlığını istəyirdi. Son hadisələr göstərdi ki, Ərdoğanın "kürd açılımı" siyasəti özünü doğrultmadı. Buna görə də, AKP 1 noyabr seçkilərində də səs itirə bilər".

Qabil Hüseynli: "Şəhidlərin üzərindən siyasət yürütmək heç bir siyasətçiyə baş ucalığı gətirmir, gətirməyəcək də. PKK-ya qarşı mübarizə aparmaq üçün bir general tapa bilmirlər, bəzi generalların xidmət müddətini uzatmaq məcburiyyətində qalıblar. Türk ordusuna qarşı dəfələrlə müxtəlif dövlət çevrilişi ittihamları irəli sürərək 124-ə yaxın generalı, admiralı həbs etdiriblər. Bunları etməkdə məqsəd Türk ordusunun zəiflədilməsi idi və məqsədlərinə də çatdılar. Türk ordusu gücünə görə dünyanın 6-cı ordusu olsa da, həmin əməliyyatlar nəticəsində döyüş qabiliyyətini xeyli itirib və PKK kimi partizan müharibəsi aparan terrorçu təşkilatla lazımi mübarizə apara bilmir.

Ərdoğan Ali baş komandandır, ancaq orduya düzgün rəhbərlik edə bilmir. Ərdoğan şəhidlərə görə məsuliyyət daşıyır. Bu məsələdən istifadə edərək seçki kampaniyasını ortaya atmaq nə qədər məntiqlidir? Ərdoğan "kürd açılımı"nı elan etdi, o vaxt kürdlərin çox hissəsi faktiki olaraq siyasətlə maraqlanmırdı. "Kürd açılımı" elan edildikdən sonra hamısı milli dövlət, ən azından yüksək statuslu muxtariyyət tələb etməyə başladılar.

Partizan müharibəsi aparan terrorçular həm də yerli əhalidən dəstək alır. Şəhidlərə görə dövlətin bütün qurumları, başda prezident və baş nazir olmaqla hamısı məsuliyyət daşıyır. Ərdoğan istənilən situasiyadan seçki üçün istifadə edir. Bu pis görüntü verir. PKK ilə Türkiyə ordusu arasında iki il olardı ki, atəşkəs var idi. Kürdlər iddia edir ki, atəşkəsi seçkiyə görə Ərdoğan pozub. Avropa ölkələrində də bu fikir geniş yayılıb. Ərdoğan hər şeydən yaxasını çəkir və hər şeyin günahını paralel dövlət adlandırdığı Fətullah Gülən şəbəkəsində görür. PKK çox xain və insan həyatına susamış bir terrorçu təşkilatdır. Ərdoğan öyrənməlidir ki, kimlər, xüsusilə də hansı iş adamları PKK-ya necə yardım göstərir. Öncə bu yardımın kəsilməsinə nail olmalıdır".

Qeyd edək ki, dünən Hakkarinin Dağlıca bölgəsində PKK terror təşkilatının üzvlərinin yola basdırdıqları mina nəticəsində çox sayda türk əsgəri şəhid olub və yaralanıb.

Səxavət Məmməd
Ölkə.Az