PKK sülh istəyir, Türkiyə nə etməlidir?

Türkiyənin PKK terrorçularına qarşı keçirdiyi əməliyyatlar artıq öz nəticəsini verir

Türkiyənin Xalqların Demokratik Partiyasının (HDP) lideri Səlahəddin Dəmirtaş Türkiyəni sülhə səsləyib. Dəmirtaş çıxışında deyib ki, Artıq sülh barədə çağırışlarımıza Kürdüstan Topluluqlar Birliyindən müsbət cavablar almışıq və onlar da qarşılıqlı olaraq silahları susdurmağa və sülh danışıqlarına başlamağa hazır olduqlarını deyiblər. Rəsmi Ankaranın öhdəsinə düşən isə yalnız əməliyyatların dayandırılmasıdır.

Türkiyə hökuməti isə terrorun kökünü kəsməkdə israrlıdır.

Dəmirtaşın fikrini politoloq Qabil Hüseynli Ölkə.Az-a şərh edib:

"İndiyə qədər Türkiyə PKK-ya qarşı bir neçə dəfə əməliyyatlara başlayıb, ancaq sonradan yarımçıq dayandırıb. Bunun nəticəsində PKK vaxt qazanaraq yeni qüvvələr cəlb etməklə, başqa dövlətlərin yardımı ilə yenidən güclənib və Türkiyəyə qarşı terror mübarizəsini davam etdirib. İndi Türkiyə əməliyyatlara başlayıb və dayanmamalıdır. PKK məsələsini kompleks həll etmək lazımdır. Həm PKK-nın hərbi qanadı ləğv edilməlidir və hal-hazırda Türkiyə buna yaxındır, həm də PKK-nın siyasi qanadı məhv edilməlidir.

Türkiyədə dəfələrlə partiyalar bağlanıb. Əgər HDP Türkiyənin bütövlüyünə qarşı çıxırsa, Türkiyəni bölməyə çalışırsa, Türkiyə konstitusiyası müddəalarının əleyhinə gedirsə, həmin partiya erməni soyqırımını tanımağı tələb edirsə, o partiya bağlanmalıdır. HDP-nin bağlanması üçün kifayət qədər fakt var. HDP üzvlərinin çoxu vaxtilə PKK sıralarında döyüşüb və əlləri əsgər qanına batıb.

Kürdlər bu ölkəyə, dövlətə sadiqdirsə, başını aşağı salıb türklər, çərkəzlər, ərəblər, lazlar kimi yaşamalıdır. Ölkədə verilən bütün hüquqlardan istifadə edib, iş adamı olub, milyoner olub, amma ölkənin ərazi bütövlüyünə qarşı çıxacaqsansa, əlinə silah götürüb qan tökəcəksənsə, ölkədəki sabitliyi pozacaqsansa ya bu ölkədən çıxıb getməlisən, ya da lazım olan dərsi almalısan.

Türkiyə son ana qədər getməlidir. "Silah susmalıdır", "Tətiklər çəkilməməlidir" və s. bu kimi şairanə çağırışlar gözardı edilməlidir. Türkiyə hökuməti qətiyyətli olmalıdır".

Qeyd edək ki, Dəmirtaş bundan əvvəlki çıxışlarında PKK-nın mübarizəsini haqq mübarizəsi adlandırıb.

Səxavət Məmməd
Ölkə.Az