Bir-biri ilə rəqib siyasətçilər: qoca deputat, yeni başqan və gənc namizəd
YAP namizədlərinin siyahısını açıqlayandan sonra artıq seçkilərdə rəqiblərin kim olacağı müəyyənləşməyə başladı
Ölkə.Az parlament seçkilərində rəqibləri dəyərləndirir.
Ən maraqlı seçki daiələrindən biri 33 saylı Xətai birinci seçki dairəsi. Bu dairədən iddialı namizədlər YAP-ın namizədi Mirələmov Hüseynbala, Müsavat başqanı Arif Hacılı və D18 hərəkatının sədri Ruslan İzzətlidir.
YAP-ın parlament seçkilərindəki 33 saylı Xətai birinci seçki dairəsindən irəli sürdüyü namizədi Mirələmov Hüseynbala hal-hazırda da millət vəkilidir.
Hüseynbala Mirələmov - yazıçı, ssenarist, millət vəkili, Azərbaycan Dövlət Neft Akademiyasında kafedra müdiri, texnika elmləri doktoru, professor, Azərbaycan Mühəndislər Akademiyasının müxbir üzvü, Rusiya Mədən Akademiyasının, Azərbaycan Yazıçılar Birliyinin və Azərbaycan Jurnalistlər Birliyinin üzvü, çoxsaylı elmi və bədii əsərlərin müəllifi, "Qızıl qələm", "Qızıl dərviş", "Qızıl buta", "Abdulla Şaiq" və "Rəsul Rza" mükafatları laureatı, Fransa Sənayeçilər Assosiasiyasının "Napoleon" qızıl medalının sahibi. MDB ölkələri üzrə 8 dəfə "İlin direktoru" adına layiq görülüb. O, həm də YAP Xətai rayon təşkilatının sədridir.
Mirələmov Hüseynbalanın adı deputat olduğu dönəmdə bir sıra qalmaqallarda hallanıb. Mirələmov Hüseynbalaya aid olan "1001 gecə" istirahət mərkəzində törədilmiş qətl bir müddət ölkə gündəmini məşğul etdi.
Xatırladaq ki, "1001 gecə" istirahət mərkəzindəki qətli deputatın qardaşı oğlu Rəşad Mirələmov törətmişdi.
Müsavat başqanı Arif Hacılını xüsusi tanıtmağa gərək yoxdur. İllərdir Azərbaycan siyasətində öz dəsti-xətti ilə seçilən Arif Hacılı Xalq Hərəkatına tələbə ikən, 1988-ci ildə Bakıda keçirilən noyabr mitinqləri zamanı qoşulub. 1989-cu ildə Zaqatalada AXC-nin yerli təşkilatının yaradıcılarından biri və lideri olub. 1989-cu ilin sentyabr ayında AXC Ali Məclisinin üzvü seçilib. 1990 cı ildə 204 saylı Zaqatala seçki dairəsindən Azəbaycanın xalq deputatı seçilib. Ağdərə, Füzuli, Qubadlı, Ağdam və digər rayonların ərazilərinin erməni silahlı birləşmərinin hücumlarından müdafiəsinın təşkilində və bəzi döyüş əməliyyatlarında bilavasitə iştirak edib. 1992-ci İldə Müsavat Partiyasının Bərpa Mərkəzi yarandığı gündən Müsavat partiyasının Bərpa Mərkəzinin üzvü, 1994-cü ildən Müsavat partiyasının seçki, təşkilat məsələləri katibi, sonralar müavini, 2006-cı ildən Müsavat Partiyası Mərkəzi İcra Aparatının rəhbəri olub. 2014-cü ildə Müsavat partiyasinda alternativ qaydada keçirilən başqan seçkilərində qalib gəlib. Hazırda Müsavat Partiyasının başqanıdır.
Arif Hacılının 33 saylı Xətai birinci seçki dairəsindən namizədliyini irəli sürəcəyi bir çoxlarını təəccübləndirdi. Ona görə ki, Arif Hacılı parlament seçkiləri dövründə adətən 110 saylı Zaqatala seçki dairəsindən namizədliyini irəli sürürdü.
Müsavat Başqanı Arif Hacılı başqan seçkilərindən sonra ən çox tənqid edilən şəxslərdən biri oldu. Bir çox müsavatçı seçkinin nəticəsini tanımayaraq partiyadan uzaqlaşdı. Başqan seçkilərindən bir müddət sonra çoxlu sayda müsavatçı "Arif Hacılı partiyada diktatorluq edir" deyə partiyadan istefa verib getdi. Arif Hacılının qərarları ilə razılaşmayanlar isə partiyadan uzaqlaşdırıldı.
33 saylı Xətai birinci seçki dairəsindən namizədlərdən biri də D18 hərəkatının sədri Ruslan İzzətlidir. Ruslan İzzətli çox gənc yaşlarından ictima-siyasi fəaliyyətə başlayıb. 2009-cu ilin yanvarında Bütöv Azərbaycan Gənclər Təşkilatı yaradılması ideyasını irəli sürüb və 24 fevral 2009-cu ildə Bütöv Azərbaycan Gənclər Təşkilatını (BAGT) qurub. BAGT-nin I (Təsis) Qurultayında təşkilatın ilk sədri seçilib. Ruslan İzzətlinin təşəbbüsü ilə tarixdə ilk dəfə Güney Azərbaycan gəncləri də Quzey Azərbaycanda fəaliyyət göstərən Bütöv Azərbaycan Gənclər Təşkilatının fəaliyyətinə kütləvi surətdə qatılıblar.
2010-cu ildə Bakıda “Milli Oyanış” jurnalını təsis edib və nəşrinə başlayıb. Bu jurnal Güney Azərbaycanla bağlı geniş ideoloji-təbliğat işləri aparıb. 2011-ci ilin dekabr ayında Gənclər Forumunun yaradılmasında yaxından iştirak edib, qurumun təsis konfransında İdarə Heyətinin üzvü seçilib və hazırda Gənclər Forumunun sözçüsüdür.
2013-cü il prezident seçkisinin nəticələrinin açıqlanmasından dərhal sonra Ümid Partiyasının gənclərlə iş üzrə sədr müavini Ruslan İzzətli partiyadan istefa verdi. Ruslan İzzətli və digərləri Ümid sədri İqbal Ağazadəninin seçkilərdən sonra tutduğu mövqeyə görə bu addımı atdıqlarını açıqladılar.
Ruslan İzzətli hal-hazırda D18 hərəkatının sədridir və 33 saylı Xətai birinci seçki dairəsindən parlament seçkilərində namizədliyini verərək Arif Hacılı və Mirələmov Hüseynbala kimi təcrübəli siyasətçilərə rəqib olub.
Səxavət Məmməd
Ölkə.Az
