Politoloq: \"Deputatların sayını 150 nəfərə çıxarmaq lazımdır\"

Parlament seçkiləri yaxınlaşdıqca "ölü" siyasət, "dirilməyə" başlayır

YAP namizədlərinin siyahısını açıqladı. AXCP, Milli Şura və Lalə Şövkət parlament seçkilərini boykot edir. ADP də seçkiyə qatılmayacağını elan etdi. Müsavat, Ümid və digər partiyalar isə deputat mandatı uğrunda mübarizə aparacaqlar.

Ölkədə baş verən son siyasi prosesləri politoloq Qabil Hüseyinli Ölkə.Az-a şərh edib:

"Seçkiqabağı mühit yenicə qızışır. Artıq seçkiqabağı proseslərə start verilib. YAP namizədlərinin siyahısını elan etdi. Seçkiyə qatılacaq digər partiyalar daha əvvəl namizədlərinin siyahısını elan etmişdilər. Seçkini boykot edən partiyalar da var. Bütövlükdə seçkiqabağı mühitin demokratik olduğunu söyləmək mümkündür. Çünki istənilən şəxs namizədliyini irəli sürür. Artıq indiyə qədər 500-ə yaxın şəxs MSK-da qeydiyyatdan keçib.

YAP iqtidar partiyasıdır və onun siyahısı da həlledici əhəmiyyətə malikdir. YAP açıqlayır ki, 700 mindən çox üzvüm var. 2010-cu il parlament seçkilrində YAP 70 dairədən deputat çıxara bilmişdisə, indi daha çox dairədən deputat çıxarmaq niyyətindədir. Güman edilir ki, bu məsələ qarşıdan gələn parlament seçkisində balanslaşdırılacaq. Ona görə ki, YAP-ın bəzi dairələrdəki namizədləri elə də güclü deyil. YAP bəzi dairələrdə ya müstəqil namizədlərə, ya da konstruktiv müxalifətə güzəştə gedəcək.

Hal-hazırda deputat olmaq istəyənlər saysız-hesabsızdır. 125 nəfərlik yer onların iddiaların ödəyə bilməz. Azərbaycan kimi ölkədə parlamentin tərkibini artırmaq yaxşı olardı. Parlamentin tərkibi 150 nəfərə çıxarılsa, daha yaxşı olar. Belə bir təklif də var idi. Zənnimcə mojaritar sistemlə propersional sistemi də gündəmə gətirmək lazımdır. Bu sistem olsa, seçkilərin demokratikliyi daha da artar. Proporsional sistem hələ ki, tətbiq edilmir. İnanıram ki, o da tətbiq ediləcək və Azərbaycanda daha demokratik seçkilər keçiriləcək".

Xatırladırıq ki, Azərbaycanda parlament seçkiləri noyabrın 1-də keçiriləcək.

Səxavət Məmməd
Ölkə.Az