“Yardıma ehtiyacı olan ermənilər Azərbaycan əsgərinə yaxınlaşsın” - ÇAĞIRIŞDAN

“İlk imkanda Azərbaycan ordusu tərəfindən sizə qida və digər zəruri tələbat məhsulları çatdırılacaq. Yardıma ehtiyacı olanlar Azərbaycan hərbçilərinə yaxınlaşa və müraciət edə bilərlər. Onlar sizin problemlərinizi həll etmək üçün əllərindən gələni edəcəklər”.

“Ölkə.Az” xəbər verir ki, bu fikirlər Azərbaycan ordusunun Qarabağda Azərbaycan Respublikasının konstitusiya quruluşunun bərpa edilməsi məqsədilə həyata keçirdiyi lokal xarakterli antiterror tədbirləri ilə bağlı bölgədə yaşayan erməniəsilli sakinlərə müraciətində  əksini tapıb.

Müraciətdə deyilir ki, “siz Azərbaycan vətəndaşı kimi daha ləyaqətli həyata layiqsiniz”:

“Cinayətkar rejim sizi və doğmalarınızı Azərbaycan əsgərləri ilə döyüşməyə çağırır, amma öz ailə üzvlərini müxtəlif yollarla Qarabağdan çıxarırlar. Övladlarınızı mənasız ölümdən xilas edin. Azərbaycan sizə dostluq və sülh arzulayır. Heç kimin, heç bir xarici ölkənin yalan vədlərinə inanmayın. Təhlükəsizlik zəmanətini sizə Azərbaycan dövləti verir. Ölkəmizin digər sakinləri kimi, siz də barış və rifah içərisində yaşamalısınız.

Sizin də bu həqiqəti qəbul etməyiniz və bu ölkənin vətəndaşları kimi yeni gözəl həyata qovuşmağınız lazımdır.

Sizə boş vədlər verənlər yenə həmişəki kimi qaçıb gizləniblər. İndi sınaq, tarixi seçim anıdır. Doğru seçim edin”.

Mürtəza
Ölkə.Az