Qarabağda məlumat vərəqələri havadan səpələnib?

"Qarabağda yaşayan erməni əhalisinə Azərbaycan, ingilis və rus dilində ünvanlanan müraciət vərəqələr formasında dərc edilib. Bu müraciət lokal xarakterli antiterror tədbirlərinin Xankəndidəki separatçı rejimin ləğv edilməsi hədəfini ortaya qoyur".

Ölkə.Az xəbər verir ki, bu sözləri siyasi şərhçi Asif Nərimanlı qeyd edib. Onun sözlərinə görə, iki məqam bu kontekstdə xüsusilə əhəmiyyətlidir:

"Birincisi, müraciətin mətnidir: burada hədəfin qanunsuz dəstələri tərksilah edilməsi və separatçılar olduğu açıq qeyd olunur, Azərbaycan əsgərinin əhalini xuntadan xilas etməyə gəldiyi bildirilir;

İkincisi, müraciətin dərc olunduğu vərəqələr Xankəndiyə çatdırılmasıdır: müraciəti təkcə media və sosial şəbəkələrdə dərc etməklə erməni əhalisinə çatdırmaq imkanı azdır, bu baxımdan, müraciətin praktiki olaraq çatdırılması həyata keçirilə bilər ki, vərəqə formasında dərc edilməsi də buna hesablanıb. İstisna deyil ki, vərəqələr havadan şəhərə səpələnsin; dünyada antiterror tədbirləri zamanı terrorçuların nəzarət etdiyi ərazilərdə qalan əhali ilə bu formada təmas qurmaq təcrübəsi var".

A.Nərimanlı hesab edir ki, proseslər separatçıların çıxılmaz vəziyyətə düşdüyünü deməyə əsas verir:

"Paşinyan Ermənistanın “müharibəyə qoşulmayacağını” bildirib və Rusiya ilə BMT Təhlükəsizlik Şurasına Bakının antiterror tədbirlərini dayandırmaq çağırışı edib. Zaxarovanın “rəsmi İrəvanın Qarabağı Azərbaycanın bir hissəsi kimi tanıması ilə nə edək?” replikasını Rusiyanın prosesə müdaxilə etməyəcəyi mesajı kimi qəbul edə bilər. İrəvanın ümidi BMT TŞ-də Bakıya qarşı qərarın qəbul edilməsidir, Fransa buna nail olmağa çalışır, lakin müzakirələrin keçirilməsi mümkün olsa belə, hansısa qərarın/qətnamənin qəbul edilməsi ehtimalı azdır.

Erməni mənbələr separatçıların hərbi mövqeləri arasında rabitənin itdiyini, çaxnaşmanın düşdüyünü yazırlar".